انٹرنیشنل کرکٹ کونسل ( آئی سی سی ) ٹی 20 ورلڈ کپ کی فاتح بھارتی ٹیم کے کس کھلاڑی کو کتنی انعامی رقم ملے گی ؟ اس حوالے سے تفصیلات سامنے آگئی ہیں۔
یاد رہے کہ بھارتی کرکٹ بورڈ کے سیکرٹری جے شاہ نے ٹی 20 ورلڈ کپ کی فاتح ٹیم کے لئے 125 کروڑ بھارتی روپے کا اعلان کیا تھا۔
میڈیا رپورٹس کے مطابق بھارتی اسکواڈ میں 15 کھلاڑیوں سمیت اسپورٹ اسٹاف، ریزروز اور دیگر 42 افراد شامل تھے اور انعامی رقم تمام افراد میں تقسیم کی جا رہی ہے۔
انعامی رقم میں سے ہر کسی کو اس کے رول کے مطابق حصہ دیا جائے گا۔
15 رکنی اسکواڈ کو یکساں طور پر پانچ پانچ کروڑ روپے دئیے جائیں گے جبکہ ہیڈ کوچ راہول ڈریوڈ کو بھی پانچ کروڑ روپے ملیں گے۔
اسپورٹ اسٹاف کے اراکین کو ڈھائی ڈھائی کروڑ روپے دئیے جائیں گے جبکہ سلیکشن کمیٹی کے اراکین کو ایک ایک کروڑ روپے ملیں گے۔
تین فزیو تھراپسٹ تین تھرو ڈاؤن اسپیشلسٹس دو مساجر اور اسٹرنتھ اینڈ کنڈیشنگ کوچ کو دو دو کروڑ روپے ملیں گے۔
چار ریزروکھلاڑیوں کو بھی ایک ، ایک کروڑ روپے مل رہے ہیں۔
انعامی رقم کی تقسیم کے حوالے سے تمام کرکٹرز کو آگاہ کر دیا گیا ہے۔
