پاکستان کرکٹ ٹیم کے ہیڈ کوچ گیری کرسٹن نے ٹیم کے اتحاد پر سوال اٹھا دیا۔
ذرائع کے مطابق قومی ٹیم کے ہیڈ کوچ گیری کرسٹن نے قومی کرکٹرز کو آئینہ دکھاتے ہوئے آئر لینڈ کے خلاف میچ کے بعد کھلاڑیوں سے کھلے انداز میں گفتگو کی اور کھلاڑیوں کے فٹنس لیول اسکلز اور کھیل سے آگاہی نہ ہونے پر مایوسی کا اظہار کیا۔
ذرائع نے بتایا ک ہیڈ کوچ قومی ٹیم کے کھلاڑیوں کے متحد نہ ہونے اور ایک دوسرے کو اسپورٹ نہ کرنے پر بھی مایوس ہوئے اور انہوں نے کھلاڑیوں کے آپس کے اختلافات کے حوالے سے بھی کھل کر گفتگو کی۔
گیری کرسٹن سنئیر کھلاڑیوں کے اختلافات اور ٹیم کے معاملات میں عدم دلچسپی سے بھی ناخوش تھے۔
ہیڈ کوچ کا کہنا تھا کہ ہمارا فٹنس لیول معیاری نہیں اسے بڑھانا پڑے گا ، ٹیم کے کھلاڑیوں کا فٹنس لیول اپ ٹو دی مارک ہے ہی نہیں ، ہم اسکلز لیول میں دنیا سے بہت پیچھے ہیں، اتنی کرکٹ کھیلنے کے باوجود کھیل سے آگاہی نہیں کونسا شاٹ کب کھیلنا کسی کو علم نہیں۔
گیری کرسٹن کا کہنا تھا کہ جب سے آیا ہوں یہی نوٹ کیا ہے کہ اس ٹیم میں اتحاد نہیں ہے، کہنے کے لیے یہ ٹیم ہے لیکن یہ ٹیم ٹیم نہیں ہے ، کوئی کھلاڑی کسی کو اسپورٹ نہیں کرتا دائیں بائیں سب الگ الگ الگ ہیں ، کئی ٹیموں کے ساتھ کام کر چکا ہوں ایسی صورتحال نہیں دیکھی۔
ان کا کہنا تھا کہ اگر ہم نے دنیا کا مقابلہ کرنا ہے تو فٹنس اور اسکلز کو بہتر بنانا ہے اور متحد ہونا ہے، جو کھلاڑی ان چیزوں کو بہتر کرے گا وہی ٹیم میں ہوگا ورنہ کوئی ٹیم میں نہیں ہو گا۔
