وزیرداخلہ محسن نقوی کا کہنا ہے کہ چینی بھائیوں کا تحفظ حکومت پاکستان کی اولین ترجیح ہے، چینی شہریوں کی سیکیورٹی کیلئے جامع اور مؤثرایس او پیز بنائے ہیں۔
تفصیلات کے مطابق وفاقی وزیر داخلہ محسن نقوی نے چینی سفیر جیانگ زی ڈونگ سے ملاقات کی، پاک چین تعلقات کے فروغ اور چینی شہریوں کی سیکیورٹی سے متعلق اقدامات پر تبادلہ خیال کیا گیا۔
وفاقی وزیرداخلہ محسن نقوی اور چینی سفیر نے وزیراعظم شہباز شریف کے حالیہ دورہ چین کے حوالے سے بھی بات چیت کی۔ محسن نقوی نے کہا وزیراعظم کے دورہ چین سے دوستی کا رشتہ مزید مضبوط ہوا۔
وزیرداخلہ کا کہنا ہے کہ چینی شہریوں کی سیکیورٹی کیلئے جامع اور مؤثر ایس او پیز بنائے ہیں۔ اسلام آباد میں غیرملکی شہریوں کیلئے الگ فورس ایس پی یو بنائی جا رہی ہے۔ چینی بھائیوں کا تحفظ حکومت پاکستان کی اولین ترجیح ہے۔ کوشش ہے کہ کسی چینی شہری پر ذرا سی آنچ بھی نہ آئے۔
وزیر داخلہ محسن نقوی نے واضح کیا کہ پاکستان اور چین کی لازوال دوستی میں کوئی دراڑ نہیں ڈال سکتا۔ کسی سازش کو ہر گز کامیاب نہیں ہونےدیں گے۔ چینی سفیرجیانگ زی ڈونگ نے کہا کہ پاکستان اور چین ہر موسم کے دوست ہیں، پاکستان کے ساتھ تعلقات کو انتہائی اہمیت دیتے ہیں۔
