کیپٹل ڈویلپمنٹ اتھارٹی ( سی ڈی اے ) نے پاکستان تحریک انصاف ( پی ٹی آئی ) کے مرکزی سیکرٹریٹ کو سیل کردیا۔
جمعرات اور جمعہ کی درمیانی شب سی ڈی اے نے کارروائی کرتے ہوئے پی ٹی آئی کے مرکزی سیکرٹریٹ کو سیل کردیا جبکہ کارروائی سی ڈی اے بلڈنگ کنٹرول ڈائریکٹوریٹ کی جانب سے کی گئی۔
انسداد تجاوازت کی ٹیمیں بھاری مشینری کے ہمراہ پی ٹی آئی سیکریٹریٹ پہنچی جہاں پولیس کی نفری بھی موجود تھی۔
WhatsApp Image 2024-05-24 at 00.51.17 (1) by nsb.taurusian on Scribd
ترجمان کے مطابق سی ڈی اے نے کارروائی سیاسی جماعت کی جانب سے قائم تجاوزات کیخلاف کی۔
ترجمان کا کہنا تھا کہ سیکٹر جی ایٹ فور میں واقع پلاٹ سرتاج علی نامی شخص کو الاٹ ہے اور پلاٹ پر بلڈنگ بائی لاز کی خلاف ورزی کرکے ایک اضافی منزل بھی تعمیر کی گئی۔
ترجمان کا کہنا تھا کہ سیاسی جماعت نے پلاٹ سے ملحقہ اراضی پر قبضہ کر کے بڑے پیمانے پر تجاوزات قائم کی ہیں۔
ترجمان نے بتایا کہ پلاٹ مالک کو متعدد بار خبردار کرنے کیساتھ نوٹس بھی جاری کئے جا چکے ہیں ، 19نومبر2020 ،22فروری 2021 اور پھر14 جون 2022 کو نوٹس جاری کیا گیا جبکہ احکامات پر عمل نہ کرنے پر 4 ستمبر 2023کو شوکاز نوٹس جاری کیا گیا۔
ان کا کہنا تھا کہ 10مئی 2024 کو اِس پلاٹ کو سر بمہر کرنے کے احکامات جاری کئے گئے۔
ترجمان نے مزید کہا کہ تجاوزات اور غیر قانونی تعمیرات کے خاتمے کی مہم بلا تفریق جاری رہے گی۔
تصادم اور گرفتاری
سی ڈی اے کی کارروائی کے دوران پی ٹی آئی کارکنان اور پولیس کے درمیان تصادم بھی پیش آیا جبکہ پی ٹی آئی کی جانب سے دعویٰ کیا گیا کہ پولیس نے پارٹی رہنما اور پی ٹی آئی اسلام آباد کے صدرعامر مغل کو گرفتار کرلیا ہے۔
تاہم، ڈپٹی کمشنر عرفان میمن نے آپریشن کے دوران کسی بھی گرفتاری کی تردید کی۔
پی ٹی آئی چیئرمین بیرسٹر گوہر
پی ٹی آئی چیئرمین بیرسٹر گوہر کا اس حوالے سے کہنا تھا کہ سی ڈی اے سے کہا ہے ہمیں بتائیں کیا تجاوزات ہیں ، ہم خود ہٹائیں گے، پارٹی عمارت پرحملہ غیرآئینی اورغیرقانونی ہے، پارٹی عمارت پرحملے کیخلاف عدالت سے رجوع کریں گے، ہمیں تجاوزات سے متعلق کوئی نوٹس نہیں ملا، عدلیہ سے درخواست ہے معاملے کا نوٹس لیا جائے۔
بیرسٹر گوہر کا کہنا تھا کہ ہم سے زیادتیاں کی گئیں ، گھروں میں داخل ہوئے، اب رؤف حسن پرحملہ کرایا گیا، رات کے اندھیرے میں کوئی تجاوزات کیخلاف آپریشن نہیں ہوتا، خواجہ سراؤں کے روپ میں ہم پر حملے کیے جا رہے ہیں۔
ان کا کہنا تھا کہ آپ عمارتیں گرا سکتے ہیں ، لوگوں سے ان کا نظریہ نہیں چھین سکتے، الیکشن میں انتخابی نشان لیا گیا ، عوام نے پھر بھی ووٹ دیئے، الیکشن کے بعد ہم آگے بڑھنا چاہتے تھے۔
اپوزیشن لیڈر عمر ایوب
اپوزیشن لیڈر عمر ایوب کا میڈیا سے گفتگو کرتے ہوئے کہنا تھا کہ پی ٹی آئی سیکرٹریٹ پر آپریشن کی مذمت کرتے ہیں، ہمارے ایم این اے عامر مغل کو پولیس نے گرفتار کرلیا ہے۔
ان کا کہنا تھا کہ سی ڈی اے نے بغیر نوٹس کارروائی کی ، اچھے ماحول میں بات ہوسکتی تھی۔
انہوں نے کہا کہ بطور اپوزیشن لیڈر میرا استحقاق مجروح ہوا ہے، چیئرمین سی ڈی اے اور آئی جی اسلام آباد کو کمیٹی میں بلائیں گے، عدالت کے ذریعے مقابلہ کریں گے۔
ان کا کہنا تھا کہ شہباز شریف اور محسن نقوی فاشسٹ ہیں ، خمیازہ بھگتنا ہوگا، سی ڈی اے اور اسلام آباد پولیس کیخلاف صبح مقدمہ کرائیں گے، آئی جی اسلام آباد کو کمیٹی میں طلب کریں گے، پی ٹی آئی سیکریٹریٹ پر آپریشن کا معاملہ قومی اسمبلی میں اُٹھائیں گے۔
