نئے قرض پروگرام کے حوالے سے پاکستان اور بین الاقوامی مالیاتی ادارے ( آئی ایم ایف ) کے درمیان مذاکرات کے تعارفی سیشن کا اعلامیہ جاری کر دیا گیا۔
بجٹ اور نئے قرض پروگرام پر پاکستان اور آئی ایم ایف کے درمیان مذاکرات شروع ہوگئے ہیں اور پیر کو وزارت خزانہ میں پاکستان اور آئی ایم ایف کے درمیان نئے قرض پروگرام کیلئے تعارفی سیشن ہوا جس میں گورنر اسٹیٹ بینک، چیئرمین ایف بی آر اور وزارت خزانہ کے سینئر افسران بھی شریک ہوئے۔
وزارت خزانہ کی جانب سے تعارفی سیشن کا اعلامیہ جاری کردیا گیا ہے جس کے مطابق وزیر خزانہ محمد اورنگزیب سے آئی ایم ایف مشن کے وفد نے ملاقات کی جبکہ وفد کی قیادت آئی ایم ایف مشن چیف نیتھن پورٹر کررہے تھے۔
اعلامیہ کے مطابق ملاقات کا مقصد عالمی مالیاتی فنڈ کے ساتھ مزید بات چیت کا آغاز ہے۔
لازمی پڑھیں۔ آئی ایم ایف کا پاکستان میں معاشی استحکام کیلئے سیاسی استحکام یقینی بنانے پر زور
وزیر خزانہ نے اسٹینڈ بائی ارینجمنٹ کی کامیاب تکمیل پر وفد کا شکریہ ادا کیا اور میکرو اکنامک اشاریوں میں بہتری سے آگاہ کیا۔
وزارت خزانہ کے مطابق اصلاحاتی ایجنڈےکو جاری رکھنے اور اس میں توسیع کیلئے حکومت کے عزم کا اظہار کیا گیا۔
خیال رہے کہ پاکستان اور آئی ایم ایف کے درمیان مذاکرات تقریباً 2 ہفتے تک جاری رہیں گے، نئے قرض پروگرام کے علاوہ نئے مالی سال کے بجٹ پر بھی مشاورت کی جائے گی۔
پاکستان آئی ایم ایف سے 6 ارب ڈالر سے زائد کے بیل آوٹ پیکیج کیلئے پُرامید ہے۔
