محکمہ موسمیات نے رواں ہفتے گرمی کی شدت بڑھنے کی پیشگوئی کر دی۔
نمائندہ خصوصی سماٖء سے گفتگو میں چیف میٹرولوجسٹ شاہد عباس نے کہا کہ اگلے7روز لاہور میں بارش کا امکان نہیں، جمعہ سے درجہ حرارت 45 ڈگری تک جائے گا۔
دوسری جانب ملک کے بیشتر میدانی علاقوں میں شدید گرمی کی لہر جاری ہے۔ 45 ڈگری پارے کے ساتھ دادو اور تربت ملک کے گرم ترین مقامات رہے۔ آج بھی میدانی علاقوں میں غضب کی گرمی پڑے گی۔
سکھر، سبی اور موہنجوداڑو میں گرمی کی شدت 43، نوابشاہ اور مٹھی میں 42 ڈگری سینٹی گریڈ ریکارڈ کی گئی۔ جنوبی پنجاب میں بھی سورج آپے سے باہر ہے۔ ڈی جی خان اور ملتان ریجن بھی شدید گرمی کی زد میں ہے۔
محکمہ موسمیات کے مطابق بیشترعلاقوں میں آج موسم گرم اور خشک رہےگا تاہم گلگت بلتستان میں چند مقامات پر تیز ہواؤں اور گرج چمک کے ساتھ بارش کا امکان ہے۔
طبی ماہرین کے مطابق شہری باہر نکلتے ہوئے احتیاط کریں، دوپہر کے اوقات میں سرڈھانپ کرنکلیں اور پانی کا زیادہ سے زیادہ استعمال کیا جائے۔
