مصر سے تعلق رکھنے والے محمد زکریا نے 16 ویں چیف آف نیول اسٹاف انٹرنیشنل اسکواش چیمپئن شپ جیت لی۔
پاک فوج کے شعبہ تعلقات عامہ ( آئی ایس پی آر ) کے مطابق 16 ویں چیف آف نیول اسٹاف انٹرنیشنل اسکواش چیمپئن شپ اختتام پزیر ہوگئی جبکہ مصر کے محمد زکریا ایونٹ کے فاتح قرار پائے۔
آئی ایس پی آر کے مطابق ایونٹ کی اختتامی تقریب روشن خان جہانگیر خان اسکواش کمپلیکس کراچی میں منعقد کی گئی جبکہ نیول چیف ایڈمرل نوید اشرف اختتامی تقریب کے مہمان خصوصی تھے۔
چیمپئن شپ میں 5 ملکی اور 19 غیر ملکی کھلاڑی شریک تھے جبکہ چیمپئن شپ میں مصر ، ہانگ کانگ ، ملائیشیا ، جمہوریہ چیک ، جاپان، جرمنی ، برطانیہ اور نیدرلینڈز کے کھلاڑیوں نے حصہ لیا۔
پاکستان کے کھلاڑی ناصر اقبال چیمپیئن شپ کے رنراپ رہے۔
نیول چیف نے چیمپئن شپ کے فاتح اور رنر اپ کھلاڑیوں میں انعامات تقسیم کیے۔
اختتامی تقریب میں سول و عسکری شخصیات،اسپانسرز،قومی کھلاڑیوں اور شائقین کی بڑی تعداد نے شرکت کی۔
