غیرملکی میڈیا نے دعویٰ کیا ہے کہ ایران میں اسرائیلی فضائیہ کی کارروائی کی اطلاعات ہیں۔ ایرانی ایجنسی نے بھی اصفہان ایئرپورٹ فوجی ایئربیس کے قریب دھماکوں کی تصدیق کی ہے تاہم ایران نے سرکاری سطح پر تصدیق نہیں کی۔
میڈیا رپورٹ کے مطابق اسرائیلی فضائیہ کی جانب سے اصفہان ہوائی اڈے کے قریب کارروائی کی اطلاعات ہیں، ایران کے وسطی علاقے اصفہان میں دھماکے کی آواز سنی گئی ہے، ساتھ ہی شام کے السویدہ گورنریٹ میں بھی دھماکےکی اطلاعات ہیں۔
رپورٹ کے مطابق عراق میں بغداد اور بابل گورنریٹ میں بھی دھماکے ہوئے ہیں، تاہم کسی جانی نقصان کی تاحال کوئی اطلاع موصول نہیں ہوئی۔ ایران اور عراق نے دھماکوں کی تصدیق نہیں کی۔
امریکی خبر ایجنسی نے امریکی عہدیدار کا حوالہ دے کر بتایا کہ اسرائیلی میزائلوں نے ایران میں ایک مقام کو نشانہ بنایا ہے۔ ایرانی خبر ایجنسی کے مطابق اصفہان کے ہوائی اڈے پر دھماکا ہوا ہے تاہم اب تک نوعیت کا تعین نہیں کیا گیا۔
ایرانی خبر ایجنسی کے مطابق ایران نے متعدد شہروں میں ائیرڈیفنس سسٹم فعال کردیا ہے، اصفہان اور شیراز کیلئے پروازیں معطل کردی گئیں جبکہ تہران ائیرپورٹ پر پروازوں کی منسوخی کے اعلانات کیساتھ لوگوں کو گھر جانے کی ہدایت کی گئی ہے۔
ایرانی میڈیا کے مطابق ایران کے شہراصفہان کی فضا میں تین ڈرون مقامی وقت کے مطابق رات 12بج کر30منٹ پردیکھے گئے، ڈرون حملوں کے بعدفضائی دفاعی نظام کو فعال کر دیا گیا ، اصفہان کی فضا میں تین فضائی دفاعی نظام فعال ہونے کے بعد تباہ ہو گئے۔
برطانوی میڈیا سے گفتگو میں ایک ایرانی اہلکار نے کہا کہ اصفہان میں دفاعی فضائی نظام کو فعال کرنے کے سبب دھماکے کی آوازیں سنی گئیں تاہم ایران پر کوئی میزائل حملہ نہیں ہوا۔ تاحال اسرائیل کی جانب سے فضائی حملے پرکوئی ردعمل نہیں آیا۔
