نیوزی لینڈ کرکٹ ٹیم کے دو اہم کھلاڑی فن ایلن اور ایڈم ملنے پاکستان کے خلاف ٹی 20 سیریز سے باہر ہوگئے۔
نیوزی لینڈ کرکٹ ٹیم کو ٹی 20 سیریز کیلئے دورہ پاکستان سے قبل ہی بڑا دھچکا لگ گیا، ٹیم کے دو اہم کھلاڑی فن ایلن اور ایڈم ملنے سیریز سے آؤٹ ہوگئے ہیں۔
کیویز کرکٹ کے مطابق ایلن اور ملنے تربیت کے دوران انجری کا شکار ہوگئے ہیں جس کے بعد دونوں کھلاڑی پاکستان کے خلاف سیریز میں شرکت نہیں کر سکیں گے۔
دونوں کھلاڑیوں کے آؤٹ ہونے کے بعد وکٹ کیپر بیٹر ٹام بلنڈل اور آل راؤنڈر زیک فاولکس کو ٹیم میں شامل کیا گیا ہے۔
ٹی 20 سیریز کے لئے زیک فولکس پہلی مرتبہ سکواڈ کا حصہ بنیں گے جبکہ ٹام بلنڈل گزشتہ برس پاکستان کا دورہ کرچکے ہیں۔
نیوزی لینڈ کے کوچ گیری سٹیڈ نے کھلاڑیوں کا انجرڈ ہونا بدقسمتی قرار دیا اور کہا کہ دونوں گزشتہ ورلڈ کپ سے ہمارے لیے ٹی ٹوئنٹی میں بہترین کارکردگی دکھا چکے ہیں۔
یاد رہے کہ کیویز سکواڈ 14 اپریل کو پاکستان پہنچے گا اور دونوں ٹیموں کے درمیان پہلا ٹی ٹوئنٹی 18 اپریل کو شیڈول ہے۔
