ڈیرہ اسماعیل خان میں پاک فوج نے ریسکیو 1122 کے ساتھ مل کر سی آر بی سی نہر میں ڈوبنے والے دو افراد کی لاشیں نکال لیں۔
تفصیلات کے مطابق سی آر بی سی نہر میں پاک فوج، سول انتظامیہ اور ریسکیو 1122 نے نہر سے لاشیں نکالنے کے لیے کامیاب ریسکیو آپریشن کیا۔
گزشتہ روز سی آر بی سی نہر میں نہانے کے غرض سے جانے والے دو افراد ڈوب گئے تھے، ایک ڈوبنے والے فرد کی لاش کو ریسکیو 1122 کی مدد سے باہر نکال لیا گیا تھا جبکہ دوسرے ڈوبنے والے فرد کی لاش کی تلاش کیلئے سول انتظامیہ نے پاک فوج کی مدد طلب کی۔
پاک فوج، سول انتظامیہ اور ریسکیو 1122 نے کامیاب ریسکیو آپریشن کیا، پاک فوج کے ایس ایس جی کمانڈوز نے نہایت ہی قلیل وقت میں آپریشن مکمل کرکے ڈوبنے والے فرد کی لاش کو سول انتظامیہ کے حوالے کر دیا۔ بعد ازاں سول انتظامیہ، علاقے کے مشران اور لواحقین نے پاک فوج کے کامیاب ریسکو آپریشن پر شکریہ ادا کیا۔
