چئیرمین پاکستان کرکٹ بورڈ ( پی سی بی ) محسن نقوی سے انٹرنیشنل کرکٹ کونسل ( آئی سی سی ) کے وفد نے ملاقات کی ہے جس کے دوران پاکستان میں چیمپئنز ٹرافی کرانے کے انتظامات کے پر تفصیلی تبادلہ خیال کیا گیا۔
آئی سی سی کے وفد کی قیادت کرس ٹیٹلے کر رہے تھے جبکہ وفد کے دیگر ارکان میں سارہ ایگرڈ اور عون زیدی شامل تھے۔
وفد نے کراچی، لاہور اور راولپنڈی کے سٹیڈیمز میں سہولتوں پر اطمینان کا اظہار کیا۔
اس موقع پر چیئرمین پی سی بی کا کہنا تھا کہ چیمپئنز ٹرافی کے لئے ہر سطح پر فول پروف انتظامات کیے جائیں گے، چیمپئنز ٹرافی جتنا بڑا ٹورنامنٹ ہے اس کے مطابق انتظامات یقینی بنائے جائیں گے۔
محسن نقوی کا کہنا تھا کہ سٹیڈیمز کی اپ گریڈیشن کا کام چیمپئنز ٹرافی سے قبل مکمل کر لیا جائے گا اور تمام ضروری امور بر وقت مکمل کر لئے جائیں گے۔
چیئرمین پی سی بی نے پاکستان میں چیمپئنز ٹرافی کی کامیاب میزبانی کے لیے پی سی بی کے عزم کا اعادہ بھی کیا۔
قبل ازیں آئی سی سی کا وفد نیشنل اسٹیڈیم کراچی اور قذافی اسٹیڈیم لاہور کے بعد راولپنڈی کرکٹ اسٹیڈیم پہنچا اور پنڈی کرکٹ سٹیڈیم کے مختلف انکلوژر کا دورہ کیا۔
پی سی بی حکام نے وفد کو پنڈی سٹیڈیم کے انتظامات ، تیاریوں اور سیکیورٹی انتظامات پر بریفنگ دی۔
