پاکستان سپر لیگ سیزن 9 کے فائنل میچ میں اسلام آباد یونائیٹڈ نے ملتان سلطانز کو 2وکٹوں سے شکست دیتے ہوئے ٹائٹل جیت لیا
تفصیلات کے مطابق اسلام آباد یونائیٹڈ نے ملتان سلطانز کی جانب سے دیا گیا 160 رنز کا ہدف آخری اوور میں 8 وکٹوں کے نقصان پر عبور کر لیا۔ اسلام آباد یونائیٹڈ کی جانب سے ہد ف کے تعاقب میں بیٹنگ کا آغا مارٹن گپٹل اور کولن منرو نے کیا لیکن منرو 26 رنز کے مجموعے پر 17 رنز بنا کر خوشدل شاہ کی گیند کا نشانہ بنے اور افتخار احمد کے ہاتھوں کیچ آوٹ ہو گئے ، ان کے بعد آغا سلمان نے میدان سنبھالا لیکن وہ بھی 10 رنز پر خوشدل شاہ کی گیند کا نشانہ بنے اور پولین لوٹ گئے ۔ان کے بعد کپتان شاداب خان آئے لیکن وہ بھی متاثر کن کارکردگی دکھانے میں کامیاب نہیں ہو سکے اور صرف 4 رنز پر افتخار احمد کی گیند پر بولڈ ہو گئے ۔اوپننگ پر آئے مارٹن گپٹل نے اچھی بیٹنگ کا مظاہرہ کرتے ہوئے 32 گیندوں پر 50 رنز بنائے اور رن آوٹ ہو گئے جس سے ٹیم کو بڑا دھچکا پہنچا ۔
مارٹن گپٹل کے بعد اعظم خان نے وکٹ سنبھالی لیکن وہ 30 رنز بنانے میں کامیاب ہوئے اور اسامہ میر کی گیند پر محمد رضوان کے ہاتھوں کیچ آوٹ ہو گئے ۔یہ ایسا موقع تھا جہاں اسلام آباد کو اعظم خان کی سب سے زیادہ ضرورت ہے تاہم وہ کامیاب نہیں ہو سکے ۔
اس سے قبل ملتان سلطانز نے ٹاس جیت کر بیٹنگ کا فیصلہ کیا اور مقررہ 20 اوورز میں 9 وکٹوں کے نقصان پر 159 رنز بنائے، محمد افتخار نے ڈولتی ہوئی ٹیم کو سنبھالا دیا اور قابل دفاع ہدف دینے میں انتہائی اہم کردار ادا کیا ، اوہ20 گیندوں پر 32 رنز کے ساتھ ناقابل شکست دہے ۔
ملتان کی جانب سے یاسر خان اور محمد رضوان نے میدان میں اتر کر کھیل کاآغاز کیا لیکن اوپنر یاسر خان محض 6 رنز بنا کر عماد وسیم کی گیند پر ملز کے ہاتھوں کیچ آوٹ ہو گئے ، ان کے بعد ڈیوڈ ویلی بھی عماد وسیم کی گیند کا نشانہ بنے اور 6 رنز پر بولڈ ہو کر پولین لوٹ گئے ۔ ان کے بعد اگلی وکٹ جانسن چارلز کی گری جو کہ 4 رنز بنا کر پولین لوٹ گئے ۔ کپتان محمد رضوان بھی صرف 26 رنز ہی بنانے میں کامیاب ہو سکے ۔
ملتان سلطانز کے عثمان خان شاندار انداز میں بیٹنگ جاری رکھے ہوئے تھے کہ 57 رنز کے مجموعے پر وہ شاداب خان کی گیند پر کیچ آوٹ ہو کر پولین لوٹ گئے ۔
اسلام آباد یونائیٹڈ کے عماد وسیم نے بہترین باولنگ کا مظاہرہ کرتے ہوئے ملتان سلطانز کے 5 جبکہ شاداب خان نے 3 کھلاڑیوں کو آوٹ کیا ۔
اسلام آباد یونائیٹڈ کی پلیئنگ الیون میں کولن منرو، مارٹن گپٹل ، سلمان علی آغا، شاداب خان ، اعظم خان ، حیدرعلی ، عماد وسیم، فہیم اشرف ،نسیم شاہ، حنین شاہ اور عبید میکائے شامل ہیں۔
ملتان سلطانز کی پلیئنگ الیون میں محمد رضوان، یاسر خان ،عثمان خان ، جانسن چارلز، افتخار احمد ، خوشدل شاہ ، کرس جورڈن ، ڈیوڈ ویلی ، اسامہ میر ، محمد علی اور عباس آفریدی شامل ہیں ۔
