پاکستان شوبز انڈسٹری کے اداکار اور پروڈیوسر سعود قاسمی نے دعویٰ کیا ہے کہ مجھے بھارتی فلم انڈسٹری سے اب بھی فلموں کی پیشکش ہوتی ہے۔
سعود قاسمی معروف پاکستانی اداکار اور پروڈیوسر ہیں جو اپنی شاندار صلاحیتوں اور کامیاب فلموں میں نمایاں اداکاری کے لیے مشہور ہیں۔
اداکار نے بہت سی مشہور پاکستانی فلموں اور ٹیلی ویژن ڈراموں میں پرفارم کیا ہے جن میں محبت 95، مس استنبول اور مجاجن شامل ہیں، اس کے علاوہ انہوں نے ’ یہ زندگی ہے ‘ اور ’ خدا اور محبت ‘ جیسی ہٹ ٹی وی سیریز کے ساتھ بطور پروڈیوسر بھی کامیابی حاصل کی۔
حال ہی میں سعود قاسمی نے نجی ٹی وی کے ایک پروگرام میں شرکت کی جہاں انہوں نے فلموں میں کام کے حوالے سے بات چیت کی۔
انہوں نے بتایا کہ میرا فلمیں کرنے کا ارادہ ہے اور میں ایسی فلمیں کر سکتا ہوں جیسی دوسرے تمام اداکار کر رہے ہیں۔
ان کا کہنا تھا کہ بڑی حیرانگی کی بات ہے کہ مجھے پڑوسی ملک سے تین فلموں کی آفرز آئیں بلکہ جس کردار کے لئے مجھے آفر دی گئی اسی کردار کے لئے علی خان سے بھی رابطہ کیا گیا اور آفر بھی بالی ووڈ کے ایک ڈائریکٹر کی جانب سے آئیں۔
انہوں نے بتایا کہ ابھی حال ہی میں میں نے اور علی خان نے ایک فلم شوٹ کی ہے جس کا نام ’ ہم سب ‘ ہے ، بہت اچھی فلم ہے اور جلد ہی ریلیز ہوگی۔
انہوں نے مسکراتے ہوئے مزید کہا کہ ’ مجھے انڈیا سے کئی آفرز ملیں لیکن پاکستان سے کوئی آفر نہیں آئی ‘۔
