23 مارچ کو یوم پاکستان منانے کے لئے مسلح افواج کی خصوصی پریڈ کی تیاریاں پورے جوش و خروش سے جاری ہیں اور پریڈ کے لیے خصوصی طور پر آرمرڈ وہیکلز کو بھی تیار کیا جا رہا ہے۔
پریڈ کی تیاریوں میں آرمرڈ کور کی یونٹیں بڑھ چڑھ کر حصہ لے رہی ہیں اور اس حوالے سے جوانوں نے اپنے جذبات کا اظہار کرتے ہوئے کہا کہ ویسے تو ہم پورا سال ہی اپنی گنز کی دیکھ بھال کرتے ہیں لیکن 23 مارچ کو جذبہ ہی کچھ اور ہوتا ہے۔
سروس انچارج غلام رسول کا کہنا تھا کہ 23 مارچ کے دن ہم بہت خوش ہوتے ہیں اور اس دن کے لیے جب ہماری یونٹیں منتخب ہوتی ہیں تو ہم انتہائی جذبے، محنت اور لگن سے اپنا کام کرتے ہیں۔
انہوں نے کہا کہ جب پوری دنیا مسلح افواج کی پریڈ دیکھتی ہے اور ہماری محنت سے پاکستان کا نام روشن ہوتا ہے تو ہمارا بھی سر فخر سے بلند ہو جاتا ہے۔
پینٹر غلام فرید نے بتایا کہ ہم دنیا کو پیغام پہنچانا چاہتے ہیں کہ پاکستانی قوم بہت محنت اور مشقت سے اپنے تمام فرائض ادا کرتی ہے۔
انہوں نے اس عزم کا اظہار کیا کہ ’ آرہے ہیں میدان میں 23 مارچ کو، ہم پاکستان کا پرچم بلند کیے ہوئے ‘۔
