خیبر کے علاقے بازار ذخہ خیل میں بوسیدہ کمرے کی چھت گرگئی۔ افسوسناک واقعے میں ایک ہی خاندان کے 6 افراد جاں بحق ہوگئے۔
تفصیلات کے مطابق خیبرپختونخوا کے ضلع خیبر کے علاقے بازار ذخہ خیل میں چھت گرنے سے 4 بچوں سمیت 6 افراد جاں بحق ہوگئے۔ علاقہ مکینوں نے اپنی مدد آپ کے تحت لاشیں نکال لیں۔
مقامی پولیس حکام کے مطابق گزشتہ تین روز سے جاری بارشوں کے باعث مکان بوسیدہ ہوگیا تھا، جس کے باعث افسوسناک حادثہ پیش آیا۔
دوسری جانب سوات کے علاقے چاتیکل میں پہاڑی تودہ گرنے مکان کے ملبے تلے دبے تین افراد کی تلاش کے لئے آپریشن جاری ہے۔ گذشتہ روز چار افراد کی لاشیں اور چار کو زندہ نکال لیا گیا تھا۔ مکان پر گزشتہ روز پہاڑی تودہ گرنے سے اہلخانہ کے 11 افراد دب گئے تھے۔
