بھارتی پنجاب کے آنجہانی گلوکار شبھ دیپ سنگھ سدھو المعروف سدھو موسے والا کے والدین کے ہاں جلد بچے کی پیدائش متوقع ہے۔
بھارتی میڈیا رپورٹس کے مطابق مقتول پنجابی گلوکار شوبھدیپ سنگھ سدھو کے والدین جلد ہی اپنے خاندان میں ایک نئے ممبر کا استقبال کرنے والے ہیں اور خاندانی ذرائع نے تصدیق کی کہ سدھو کی والدہ چرن کور حاملہ ہیں اور جلد ہی بچے کو جنم دیں گی۔
2022 میں مانسا سے کانگریس کے ٹکٹ پر پنجاب اسمبلی کا الیکشن لڑنے والے موسے والا کو اسی سال 29 مئی کو قتل کر دیا گیا تھا جبکہ اس کیس میں گینگسٹر لارنس بشنوئی اور گولڈی برار سمیت 31 ملزمان کو نامزد کیا گیا ہے اور اب تک پچیس کو گرفتار کیا جا چکا ہے۔
موسے والا نے اپنے گانے خود لکھے ، تیار کیے اور گائے جبکہ انہیں پنجابی کے معروف ترین گلوکاروں میں سے ایک سمجھا جاتا تھا اور ان کے قتل کے بعد بھی ان کے کئی گانے ریلیز ہو چکے ہیں جو ریکارڈ ہٹ ہوئے۔
سدھو اپنے والدین کے اکلوتے بیٹے تھے جو اب پچاس کی دہائی کے آخر میں ہیں، اگرچہ ان کے والدین نے اس حوالے سے آفیشل بیان جاری نہیں کیا لیکن بھارتی میڈیا کے مطابق خاندانی ذرائع نے تصدیق کی ہے کہ جلد ہی ان کے گھر بچے کی آمد متوقع ہے۔
قیاس آرائیاں کی جا رہی ہیں کہ موسے والا کے والد بلکور سنگھ بھٹنڈہ لوک سبھا سیٹ سے انتخابی میدان میں آ سکتے ہیں، تاہم انہوں نے کہا تھا کہ اگر وہ سیاست میں آ بھی گے تو بھی کچھ نہیں بدلے گا۔
حال ہی میں موسے والا کی والدہ چرن کور نے اپنے سوشل میڈیا ہینڈلز پر ’دلی چلو‘ احتجاج میں حصہ لینے والے کسانوں کی حمایت کی تھی اور یہاں تک کہ کھنوری سرحد پر مارے گئے کسان شوبھکرن سنگھ کے لیے انصاف کا مطالبہ بھی کیا تھا۔
انہوں نے اپنے سوشل میڈیا اکاؤنٹس پر سدھو موسے والا، دیپ سدھو اور شوبھکرن سنگھ کی تصاویر بھی پوسٹ کی تھیں۔
