کراچی کی مقامی عدالت نے ڈرگ ڈیلر انمول عرف پنکی کا تین روزکا جسمانی ریمانڈ منظور کرلیا۔ پولیس ٹیم ملزمہ کو جیل سے لینے کیلئے روانہ ہوگئی۔
عدالت کے روبرو آج ملزمہ کے جسمانی ریماند کی دوبارہ استدعا کی گئی، جس پر عدالت نے ملزمہ کا 3 روز کا جسمانی ریمانڈ منظور کر لیا۔ ڈی آئی جی ساوتھ اسد رضا کی درخواست پر ریمانڈ منظور کیا گیا۔ ماتحت عدالت نے انمول عرف پنکی کو پولیس ریمانڈ کے بجائے جیل بھیج دیا تھا۔
یاد رہے کہ کراچی میں گارڈن پولیس نے کامیاب کارروائی کرتے ہوئے منشیات فروش خاتون کو گرفتار کیا تھا، ملزمہ کے قبضے سے کروڑوں روپے مالیت کی کوکین اور دیگر نشہ آور اشیا برآمد ہوئی تھیں۔
دوسری جانب منشیات فروش خاتون انمول عرف پنکی کی گرفتاری نے نیا تنازع کھڑا کردیا، پولیس کی جانب سے ایف آئی آر میں مبینہ طور پر غلط پتہ درج کیے جانے پر متاثرہ خاندان سامنے آگیا۔ متاثرین کا کہنا ہے کہ وہ گزشتہ آٹھ برس سے فلیٹ میں رہائش پذیر ہیں اور انمول عرف پنکی کو جانتے تک نہیں جبکہ ملزمہ دس مقدمات میں پولیس کو انتہائی مطلوب تھی۔
