ملک کے مختلف شہروں میں بارشوں سے متعلق الرٹ جاری کر دیا ۔ پی ڈی ایم اے پنجاب کے مطابق 16 سے 19 اپریل کے دوران صوبے کے بالائی علاقوں میں تیز ہواؤں ، آندھی اور گرج چمک کے ساتھ بارش کا امکان ہے ۔ بعض مقامات پر ژالہ باری بھی ہو سکتی ہے۔
محکمہ موسمیات کا کہنا ہے کہ مغربی ہواؤں کا ایک نیا سلسلہ ملک میں داخل ہو رہا ہے جس کے اثرات مری ، گلیات، راولپنڈی، اٹک ، چکوال، جہلم، سرگودھا، فیصل آباد، جھنگ، لاہور، گوجرانوالہ اور سیالکوٹ سمیت مختلف علاقوں میں دیکھے جائیں گے۔
پی ڈی ایم اے نے خبردار کیا ہے کہ اس دوران کمزور انفراسٹرکچر، بجلی کے کھمبوں اور سائن بورڈز کو نقصان پہنچنے کا خدشہ ہے جبکہ فصلوں کو بھی خطرات لاحق ہو سکتے ہیں ۔ پہاڑی علاقوں میں لینڈ سلائیڈنگ کا امکان بھی ظاہر کیا گیا ہے۔
محکمہ موسمیات کے مطابق سکھر، لاڑکانہ، جیکب آباد، نوابشاہ اور گردونواح میں بارش کا امکان ہے، بعض مقامات پر تیزہواؤں، گرج چمک کے ساتھ بارش متوقع ہے۔
خیبرپختونخواکے بالائی علاقوں میں بارش،پہاڑوں پر برفباری کا امکان ہے، گلگت بلتستان میں بھی بارش اور پہاڑوں پر برفباری متوقع ہے۔
