گوادر کے بعد ضلع چاغی کی ضلعی انتظامیہ نے بھی یکم اپریل سے ایران جانے کے لیے رائج ’’راہداری سسٹم‘‘ کو بند کرنے کا باضابطہ نوٹیفکیشن جاری کر دیا ہے۔
ڈپٹی کمشنر چاغی کے دفتر سے جاری اعلامیے کے مطابق ایران آنے جانے کے لیے جاری راہداری نظام کو تاحکمِ ثانی معطل کر دیا گیا ہے۔ اعلامیے میں واضح کیا گیا ہے کہ اب کسی بھی فرد کو ایران سفر کے لیے راہداری جاری نہیں کی جائے گی۔
حکام کے مطابق راہداری سسٹم کے تحت سرحدی علاقوں کے رہائشی بغیر پاسپورٹ اور ویزا کے پاکستان اور ایران کے درمیان آمد و رفت کر سکتے تھے، اور یہ سہولت صرف دونوں ممالک کے بارڈر ایریاز میں رہنے والے باشندوں کے لیے مخصوص تھی۔
جاری کردہ نوٹیفکیشن میں محکمہ داخلہ کے حکم نامے کا حوالہ دیتے ہوئے بتایا گیا کہ 15 روزہ اجازت نامہ ’’راہداری‘‘ کے تحت رشتہ داروں سے ملنے کی سہولت یکم اپریل 2026 سے فی الفور ختم کر دی گئی ہے۔ اب ایران جانے کے لیے صرف ویزا اور پاسپورٹ کے ذریعے ہی سفر ممکن ہوگا۔
قبل ازیں گزشتہ ماہ گوادر کی ضلعی انتظامیہ نے بھی ایران جانے کے لیے رائج رہداری سسٹم بند کرنے کا نوٹیفکیشن جاری کر دیا تھا۔
اسسٹنٹ کمشنر گوادر کے دفتر سے جاری اعلامیے کے مطابق ضلع انتظامیہ نے ایران جانے کے لیے جاری رہداری سسٹم کو تاحکمِ ثانی معطل کر دیا ہے۔ نوٹیفکیشن میں کہا گیا ہے کہ آئندہ کسی بھی فرد کو ایران جانے کے لیے رہداری جاری نہیں کی جائے گی۔
واضح رہے کہ یہ نظام طویل عرصے سے مقامی آبادی کے لیے ایک اہم اور آسان سفری سہولت کے طور پر استعمال ہوتا رہا ہے۔
