ڈیزل کی قیمت میں اضافے کے بعد پشاور سے بین الاضلاعی اور اندرون شہر پبلک ٹرانسپورٹ کے کرایوں میں اضافہ کر دیا گیا۔ ریجنل ٹرانسپورٹ اتھارٹی نے مسافر گاڑیوں کے نئے کرایوں کا نوٹیفکیشن جاری کر دیا۔
محکمہ ٹرانسپورٹ کے مطابق عام بسوں کا کرایہ 2.73 روپے سے بڑھا کر 3.36 روپے فی کلومیٹر مقرر کر دیا گیا ہے جبکہ ڈیلکس بسوں کا کرایہ 2.83 سے بڑھا کر 3.46 روپے فی کلومیٹر کر دیا گیا ہے۔
اسی طرح اے سی بسوں کا کرایہ 3.08 روپے سے بڑھا کر 3.71 روپے فی کلومیٹر جبکہ منی بسوں اور ویگنوں کا کرایہ 2.88 سے بڑھا کر 3.51 روپے فی کلومیٹر کر دیا گیا ہے۔
محکمہ ٹرانسپورٹ کے مطابق پبلک ٹرانسپورٹ کے کرایوں میں مجموعی طور پر 60 پیسے فی کلومیٹر اضافہ کیا گیا ہے۔
اعلامیے کے مطابق نئے کرایوں کا اطلاق پشاور، چارسدہ، نوشہرہ، خیبر اور مہمند سمیت تمام روٹس پر فوری طور پر ہوگا، محکمہ ٹرانسپورٹ نے واضح کیا ہے کہ طلبہ، نابینا، معذور افراد اور 60 سال سے زائد عمر کے شہریوں کے لیے کرایوں میں 50 فیصد رعایت برقرار رہے گی۔
ریجنل ٹرانسپورٹ اتھارٹی نے نئے کرایہ نامے پر عمل درآمد کے لیے متعلقہ حکام کو مراسلہ بھی جاری کر دیا ہے۔
