امریکا نے بڑی فوجی قوت تہران کی طرف روانہ کر دی۔ امریکی صدر کا کہنا ہے کہ ایران پر ممکنہ حملہ جوہری پروگرام پر حملے سے بھی بڑا ہوگا۔
ایئر فورس ون میں میڈیا نمائندگان سے گفتگو کرتے ہوئے امریکی صدر ٹرمپ نے کہا کہ ایک بڑی بحری اور فضائی فوجی طاقت ایران کی جانب روانہ کر دی گئی ہے۔
امریکی صدر ٹرمپ نے کہا کہ ہماری بڑی فورس ایران کی جانب رواں دواں ہیں، بہت سے جہاز ایران کی طرف جا رہے ہیں، اس فوجی نقل و حرکت کا مطلب یہ نہیں کہ امریکا لازمی طور پر فوجی کارروائی کرے گا۔
انہوں نے کہا کہ ایران پر گہری نظر رکھی ہوئی ہے، ہم ایران کے قریب احتیاطی طور پر فورس تعینات کر رہے ہیں، دیکھتے ہیں کہ آگے کیا ہوتا ہے، ایران کو کہا تھا کہ اگر پھانسیاں دیں تو کارروائی کریں گے، میری دھمکی کے بعد ایران نے پھانسیاں منسوخ کر دیں۔
امریکی صدر نے ایران سے متعلق مزید کہا کہ اگر ایران بات چیت کرنا چاہتا ہے تو ہم بھی تیار ہیں، ایران نے نیوکلیئر ہتھیار بنائے تو دوبارہ حملہ کریں گے۔ ایران پر ممکنہ حملہ جوہری پروگرام پرحملے سے بھی بڑا ہوگا، شاید ہمیں یہ فوجی طاقت استعمال نہ کرنی پڑے۔
امریکی صدر کا مزید کہنا تھا کہ یوکرین جنگ کے خاتمے کیلئے کوشاں ہیں، گرین لینڈ کی سکیورٹی پر نیٹو کے ساتھ مل کر کام کریں گے، اپریل میں چین جاؤں گا اور سال کے اختتام پر چینی صدر امریکا آئیں گے۔
