پاکستان اور امریکی افواج کی مشترکہ مشق انسپائرڈ گیمبٹ 2026 مکمل ہو گئی، انسدادِ دہشت گردی پر توجہ، دفاعی شراکت داری مزید مستحکم ہوگئی، امریکا نے پاکستان کے ساتھ مشترکہ فوجی مشق انسپائرڈ گیمبٹ کو دفاعی تعلقات میں نئی جہت قرار دے دیا۔
امریکی سینٹرل کمانڈ کے آفیشل ایکس اکاؤنٹ پر جاری بیان کے مطابق رواں ہفتے امریکی اور پاکستانی افواج نے نیشنل کاؤنٹر ٹیررازم سینٹر پبی میں مشق کے دوران مشترکہ تربیت مکمل کی۔بیان میں کہا گیا کہ مشق کے دوران انفنٹری مہارتوں، جدید حکمتِ عملیوں اور انسدادِ دہشت گردی کی کارروائیوں پر خصوصی توجہ مرکوز رکھی گئی۔امریکی سینٹرل کمانڈ کے مطابق اس مشق نے دونوں ممالک کی افواج کے درمیان باہمی اعتماد، ہم آہنگی اور عملی تعاون کو مزید مضبوط کیا ہے۔
واضح رہے کہ انسپائرڈ گیمبٹ دوہزارچھبیس کی مشق آٹھ سے سولہ جنوری دوہزارچھبیس تک جاری رہی، جو دو ہفتوں پر مشتمل تھی اور اس کا مرکزی فوکس انسدادِ دہشت گردی تھا۔انسپائرڈ گیمبٹ انیس سو پچانوے سے جاری پاکستان اور امریکہ کے دوطرفہ تربیتی سلسلے کی تیرہویں کڑی ہے جو دونوں ممالک کے دیرینہ دفاعی تعلقات کی عکاس ہے۔
