عثمان ہادی کے قتل نے بھارت اور بنگلا دیش کے تعلقات کے تابوت میں آخری کیل ٹھونک دی ہے، جس کے بعد دونوں ممالک کے درمیان کشیدگی میں خطرناک حد تک اضافہ ہو گیا ہے۔ عالمی میڈیا بھی بھارت کی مبینہ شرانگیزی کے سنگین نتائج کا اعتراف کرنے لگا ہے۔
جاپانی میڈیا کے مطابق عثمان ہادی کے قتل کے بعد بنگلا دیش اور بھارت کے تعلقات میں شدید بگاڑ پیدا ہو چکا ہے۔ رپورٹ میں کہا گیا ہے کہ اس واقعے نے دو طرفہ تعلقات کو ایک نئے بحران میں دھکیل دیا ہے۔
نکئی ایشیا کے مطابق ڈھاکا میں بڑے پیمانے پر احتجاج دیکھنے میں آ رہا ہے جبکہ بھارت مخالف جذبات میں تیزی سے اضافہ ہوا ہے۔ رپورٹ میں بتایا گیا ہے کہ بھارت نواز سمجھے جانے والے متعدد میڈیا اداروں کو مشتعل مظاہرین نے نذرِ آتش کر دیا۔
نکئی ایشیا کا کہنا ہے کہ صورتحال کی سنگینی کے پیش نظر دونوں ممالک نے ایک دوسرے کے سفارت کاروں کو طلب کر کے احتجاج ریکارڈ کرایا ہے۔ بھارت نے سیکیورٹی خدشات کا بہانہ بنا کر عارضی طور پر بنگلا دیش کے لیے ویزا خدمات بھی معطل کر دی ہیں۔
عالمی تجزیہ کاروں کے مطابق بنگلا دیش میں آئندہ انتخابات تک دونوں ممالک کے تعلقات کشیدہ رہنے کا خدشہ ہے، جبکہ موجودہ صورتحال خطے کے امن و استحکام کے لیے بھی تشویش کا باعث بن رہی ہے۔
