چیئرمین جوائنٹ چیفس آف اسٹاف کمیٹی جنرل ساحر شمشاد مرزانے جی ایچ کیو کا الوداعی دورہ کیا جس دوران فیلڈ مارشل سید عاصم منیر سے ملاقات بھی کی ، فیلڈ مارشل نے جنرل ساحر شمشاد مرزا کی مثالی قیادت اور اسٹریٹجک دور اندیشی کو سراہا۔
آئی ایس پی آر کے مطابق چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے جی ایچ کیو کا الوداعی دورہ کیا ہے۔ اس موقع پر انہوں نے فیلڈ مارشل سید عاصم منیر سے ملاقات بھی کی ۔ فیلڈ مارشل نے مسلح افواج کے درمیان ہم آہنگی بڑھانے میں جنرل ساحر شمشاد مرزا کے کردار کو سراہا۔
مشترکہ آپریشنل تیاری اور قومی سلامتی اہداف کے تحفظ پر کاوشوں کی تعریف بھی کی۔ فیلڈ مارشل سید عاصم منیر نے علاقائی استحکام اور ملٹری ڈپلومیسی میں جنرل ساحرشمشاد کے کردار کو سراہا۔۔ جنرل ساحر شمشاد مرزا نے فیلڈ مارشل اور افواج پاکستان کا شکریہ ادا کیا۔ آئی ایس پی آر کے مطابق جنرل ساحرشمشاد مرزا نے جی ایچ کیو میں یادگار شہدا پر پھول بھی چڑھائے۔ پاک فوج کے چاق و چوبند دستے نے چیئرمین جوائنٹ چیفس آف اسٹاف کمیٹی کو گارڈ آف آنر پیش کیا۔
