قومی اسمبلی کے 6 اور پنجاب اسمبلی کے 7 حلقوں کے ضمنی انتخابات میں غیرسرکاری غیرحتمی نتائج کے مطابق 13 میں سے 12 حلقوں میں مسلم لیگ (ن) میدان مار لیا ہے۔ قومی اسمبلی کے تمام 6 حلقوں میں ن لیگی امیدواروں کامیاب ہوگئے جبکہ پنجاب اسمبلی کے 7 میں سے 6 حلقوں پر ن لیگ کے امیدوار اور ایک نشست پر پیپلز پارٹی کے میاں علمدار عباس قریشی کامیاب ہوگئے۔
لاہور، فیصل آباد، ساہیوال، ڈیرہ غازی خان، سرگودھا، میانوالی اور مظفر گڑھ اور ہری پور میں پولنگ صبح 8 بجے شروع ہوئی جو شام 5 بجے تک جاری رہی۔
وزیراعظم شہبازشریف نے کامیاب لیگی امیدواروں کو مبارک باد پیش کرتے ہوئے کہا کہ ضمنی الیکشن میں کامیابی کا کریڈٹ میاں نواز شریف کے ویژن اور بےمثال قیادت اور پارٹی کارکنوں کی محنت کو جاتا ہے ۔ کامیابی وزیراعلیٰ پنجاب مریم نواز کی شبانہ روز محنت پر عوام کے اعتماد کی عکاس ہے ۔ امید ہے فاتح امیدوار اپنے حلقے کی امنگوں کی ترجمانی کرتے ہوئے عوامی خدمت میں شب و روز محنت کریں گے۔
این اے 129 لاہور
قومی اسمبلی کے اہم حلقہ این اے 129 لاہور میں سابق وفاقی وزیر حماد اظہر کے والد میاں محمد اظہر کی وفات سے خالی ہونے والی نشست پر بھی آج ضمنی انتخاب ہوا۔
این اے 129لاہور کے مکمل غیرسرکاری غیر حتمی نتیجے کے مطابق مسلم لیگ ن کے حافظ نعمان63ہزار 441 ووٹ لیکر کامیاب ہوگئے جبکہ جبکہ پی ٹی آئی کے حمایت یافتہ آزاد امیدوار 29099 ووٹ حاصل کرسکے۔ ٹرن آؤٹ 18.26 فیصد رہا۔
این اے 143 ساہیوال
این اے 143 لاہور کے مکمل غیرسرکاری غیر حتمی نتیجے کے مطابق مسلم لیگ ن کے ن لیگ کے چوہدری محمدطفیل جٹ136313ووٹ لیکر کامیاب ہوگئے جبکہ آزاد امیدوار ضرار اکبر13120ووٹ لیکر دوسرے نمبر پر رہے۔
این اے 143 ساہیوال کی نشست پی ٹی آئی حمایت یافتہ امیدوار رائے حسن نواز کو انسدادِ دہشتگردی عدالت کی جانب سے سزا سنائے جانے اور نتیجتاً ان کی نااہلی کے باعث خالی ہوئی تھی۔
این اے 185 ڈیرہ غازی خان
این اے 185 ڈی جی خان میں پاکستان مسلم لیگ ن کے سردار محمود قادر لغاری 82413 ووٹ لے کر کامیاب ہوگئے۔ پاکستان پیپلز پارٹی سردار دوست محمد کھوسہ 49262 ووٹ کے ساتھ دوسرے نمبر پر رہے۔
این اے 185 ڈیرہ غازی خان میں 8 امیدوار میدان میں تھے، یہ نشست پی ٹی آئی کی زرتاج گل وزیر کی 9 مئی کیس میں سزا اور نااہلی کے باعث خالی ہوئی۔
این اے 96 فیصل آباد
حلقہ این اے 96 فیصل آباد کے تمام 345 پولنگ اسٹیشنز کے نتائج آگئے، غیر حتمی غیر سرکاری نتائج کے مطابق (ن) لیگ کے بلال بدر چوہدری سب سے زیادہ 93 ہزار 9 ووٹ حاصل کرنے میں کامیاب رہے، بلال بدر چوہدری وزیر مملکت طلال چوہدری کے بھائی ہیں۔
این اے 104 فیصل آباد
حلقہ این اے 104 فیصل آباد 10 کی نشست بھی (ن) لیگ کے حصے میں آئی, جہاں غیر حتمی غیر سرکاری نتائج کے تحت ن لیگ کے دانیال احمد 52 ہزار 791 ووٹ لے کر کامیاب قرار پائے، جب کہ آزاد امیدوار رانا عدنان جاوید 19 ہزار 262 ووٹ لیکر دوسرے نمبر پر رہے۔
این اے 18 ہری پور
ضمنی انتخابات میں سب سے بڑا اَپ سیٹ خیبرپختونخوا کے ہزارہ ڈویژن میں ہری پور کے حلقہ این اے 18 میں ہوا، جہاں پی ٹی آئی کے رہنما اور سابق اپوزیشن لیڈر عمر ایوب کی نشست پر ان کی اہلیہ شہرناز کو شکست ہوئی۔
غیر حتمی غیر سرکاری نتائج کے مطابق مسلم لیگ (ن) کے بابر نواز خان حلقہ این اے 18 کے ضمنی انتخاب میں ایک لاکھ 63 ہزار 996 ووٹ لے کر کامیاب ہوئے جب کہ شہرناز عمر ایوب ایک لاکھ 20 ہزار 220 ووٹ حاصل کر سکیں۔
پی پی 98 فیصل آباد
پنجاب اسمبلی کے حلقہ پی پی 98 فیصل آباد ون میں (ن) لیگ کے آزاد علی تبسم نے 44 ہزار 388 ووٹوں کے ساتھ کامیابی سمیٹ لی جب کہ ان کے مخالف آزاد امیدوار محمد اجمل 35 ہزار 245 ووٹ لے کر دوسرے نمبر پر رہے۔
پی پی 115 فیصل آباد
پنجاب اسمبلی کے حلقہ پی پی 115 فیصل آباد 18 کے غیر حتمی غیر سرکاری نتائج کے مطابق (ن) لیگ کے محمد طاہر پرویز کو 49 ہزار 49 ووٹ ملے، جبکہ آزاد امیدوار محمد اصغر صرف 18 ہزار 98 ووٹ ہی حاصل کرسکے۔
پی پی 116 فیصل آباد
پنجاب اسمبلی کے حلقہ پی پی 116 فیصل آباد 19 کے تمام 190 پولنگ اسٹیشنز کے نتائج بھی سامنے آگئے, جس کے مطابق (ن) لیگ کے احمد شہریار 48 ہزار 824 ووٹ لے کر کامیاب قرار پائے جب کہ آزاد امیدوار ملک اصغر علی قیصر 11 ہزار 429 ووٹ لے کر دوسرے نمبر پر رہے۔
پی پی 203 ساہیوال
پنجاب اسمبلی کے حلقہ پی پی 203 ساہیوال 6 کے تمام 185 پولنگ اسٹیشنز کے غیر حتمی غیر سرکاری نتائج کے مطابق مسلم ليگ (ن) کے محمد حنیف 46 ہزار 900 ووٹ لے کر کامیاب ہوگئے، جب کہ آزاد امیدوار فلک شیر 10 ہزار 895 ووٹ لےکر دوسرے نمبر پر رہے۔
پی پی 73 سرگودھا
سرگودھا کے صوبائی حلقے پی پی 73 سے (ن) لیگ کےسلطان علی رانجھا 71 ہزار 770 ووٹ لے کر کامیاب ہوگئے جب کہ آزاد امیدوار مہر محسن رضا 12 ہزار 970 ووٹ لیکر دوسرے نمبر پر رہے۔
پی پی 269 مظفر گڑھ
پنجاب اسمبلی کے حلقہ پی پی 269 مظفر گڑھ 2 میں (ن) لیگ کو ناکامی کا سامنا کرنا پڑا، اس حلقے کے تمام 156 پولنگ اسٹیشنز کے غیر حتمی غیر سرکاری نتائج کے مطابق پیپلز پارٹی کے میاں علمدار عباس قریشی 55 ہزار 611 ووٹ حاصل کرکے جیت گئے۔
