افغان مہاجرین کی باعزت وطن واپسی کا سلسلہ تیزی سے جاری ہے، گزشتہ روز صرف چمن بارڈر سے 10 ہزار 700 افغان مہاجرین وطن واپس گئے، جبکہ آج سے طورخم سرحد سے بھی واپسی کا عمل شروع کر دیا گیا۔
گزشتہ روز صرف چمن بارڈر کے راستے تقریباً دس ہزار سات سو افغان مہاجرین اپنے وطن واپس گئے۔افغان مہاجرین کی وطن واپسی کا عمل آج سے طورخم سرحد سے بھی شروع کر دیا گیا ہے۔اب تک تقریباً پندرہ لاکھ ساٹھ ہزار افغان مہاجرین واپس جا چکے ہیں۔
ذرائع کے مطابق یہ واپسی مکمل طور پر قانونی طریقہ کار کے تحت ہو رہی ہے،اور ہر شخص کے دستاویزات کی تصدیق کے بعد ہی سرحد عبور کرنے کی اجازت دی جا رہی ہے۔حکام کے مطابق افغان مہاجرین کے لیے رہائش اور کھانے پینے کا بھی بندوبست کیا گیا ہے۔
پاکستان نے گزشتہ چالیس برس تک افغان عوام کی میزبانی کر کے ایک عظیم انسانی مثال قائم کی۔افغان مہاجرین کی واپسی کا یہ اقدام قومی سلامتی کو مدنظر رکھتے ہوئے اٹھایا گیا ہے۔حکومتِ پاکستان نے واضح کیا ہے کہ اب بغیر پاسپورٹ اور ویزہ کے ملک میں داخلہ ممکن نہیں ہوگا۔
