پاکستان نے امریکی کی جانب سے بی ایل اے اور مجید بریگیڈ کو غیر ملکی دہشتگرد تنظیم قرار دینے کا خیر مقدم کیا ہے۔
ترجمان دفتر خارجہ کی جانب سے جاری بیان میں کہا گیا کہ پاکستان بی ایل اے مجید بریگیڈ کو 18 جولائی 2024 سےدہشت گرد قرار دے چکا ہے،بی ایل اے مجید بریگیڈجعفر ایکسپریس اورخضدار بس حملے سمیت متعدد دہشتگردانہ کارروائیوں میں ملوث ہے۔
ترجمان دفترخارجہ نے کہا پاکستان نےبےشمار قربانیوں سےخطے اوردنیا کا تحفظ ممکن بنایا،پاکستان اپنے شہریوں کے تحفظ اور دہشتگردی کے خاتمے کے لیے پرعزم ہے،عالمی برادری کے ساتھ تعاون جاری رکھیں گے،دہشت گردی ایک مشترکہ چیلنج ہے۔
یہ بھی پڑھیں؛امریکہ نے بی ایل اے کے ذیلی گروپ مجید بریگیڈ کو غیر ملکی دہشت گرد تنظیم قرار دے دیا
خیال رہےکہ گزشتہ روز امریکی محکمہ خارجہ نےبلوچ لبریشن آرمی (بی ایل اے) کے ذیلی گروپ مجید بریگیڈ کوغیرملکی دہشت گرد تنظیم قراردیا تھا،مجید بریگیڈ کوبی ایل اےکے پہلے سے موجود خصوصی طور پرنامزد عالمی دہشت گرد (ایس ڈی جی ٹی) درجے میں شامل کیا۔
بلوچ لبریشن آرمی (بی ایل اے) کو 2019 میں متعدد دہشت گرد حملوں کے بعد ایس ڈی جی ٹی قرار دیا گیا تھا۔ 2019 کے بعد سے بی ایل اے نے مزید حملوں کی ذمہ داری قبول کی، جن میں مجید بریگیڈ کے حملے بھی شامل ہیں۔
2024 میں بی ایل اے نےکراچی ایئرپورٹ کے قریب اور گوادر پورٹ اتھارٹی کمپلیکس میں خودکش حملوں کی ذمہ داری لی۔2025 میں بی ایل اے نےکوئٹہ سے پشاور جانے والی جعفر ایکسپریس پر مارچ میں ہونے والے ہائی جیکنگ کی ذمہ داری قبول کی،جس میں 31 شہری اور سیکیورٹی اہلکار جاں بحق ہوئے اور 300 سے زائد مسافر یرغمال بنائے گئے۔
