اقوامِ متحدہ میں پاکستان کے مستقل مندوب عاصم افتخار نے مطالبہ کیا ہے کہ غزہ پر اسرائیلی قبضے کی کوشش ناقابلِ قبول ہے اور اقوام متحدہ اسرائیل کے خلاف فوری کارروائی کرے۔
سلامتی کونسل میں خطاب کرتے ہوئے اقوامِ متحدہ میں پاکستان کے مستقل مندوب عاصم افتخار کا کہنا تھا کہ غزہ میں اسرائیلی طاقت کے استعمال کو فوری طور پر روکا جائے، غزہ کی صورتحال انتہائی خوفناک ہے، ہمیں غزہ میں نسل کشی روکنے کیلئے مشترکہ کوششیں کرنی چاہیے۔
پاکستانی مندوب کا کہنا تھا کہ پاکستان عرب لیگ اور او آئی سی کے غزہ میں سے متعلق بیان کی حمایت کرتا ہے، غزہ پر اسرائیلی قبضے کی کوشش ناقابلِ قبول ہے، اقوام متحدہ اسرائیل کے خلاف فوری کارروائی کرے۔
عاصم افتخار کا کہنا تھا کہ اسرائیلی اقدامات بین الاقوامی قوانین اور اقوام متحدہ کی قراردادوں کی کھلی خلاف ورزی ہیں۔
انہوں نے کہا کہ غزہ سے فلسطینیوں کا انخلا نسل کشی کے منصوبے کا حصہ ہے۔
انہوں نے مطالبہ کیا کہ اقوام متحدہ فوری طور پر اسرائیل کے قبضے کو روکے اور مستقل جنگ بندی کروائے۔
ان کا کہنا تھا کہ غزہ میں قحط، فائرنگ، انسانی بحران ناقابلِ بیان سانحہ بن چکا، اسرائیلی کابینہ کا قبضے کا فیصلہ خطرناک اور تباہ کن جنگ کا تسلسل ہے، اسرائیل کو سیاسی تحفظ دینے والے بھی اس انسانی المیے کے شریک ہیں۔
انہوں نے مزید کہا کہ بیت المقدس کی قانونی اور تاریخی حیثیت کا تحفظ لازم ہے۔
