سندھ حکومت نے کراچی کے شہریوں کو بڑی سہولت فراہم کرتے ہوئے سیکیورٹی فیچرڈ نمبر پلیٹس لگوانے کی ڈیڈلائن میں توسیع کر دی ہے۔
اس سلسلے میں سندھ حکومت نے باقاعدہ نوٹیفکیشن بھی جاری کر دیا ہے جس کے مطابق نئی تاریخ 14 اگست سے بڑھا کر 31 اکتوبر 2025ء مقرر کی گئی ہے۔
وزیر ایکسائز اینڈ ٹیکسیشن سندھ مکیش کمار چاؤلہ نے چیئرمین پیپلز پارٹی بلاول بھٹو زرداری سے ملاقات کے بعد یہ فیصلہ کیا۔
بلاول بھٹو نے عوام کی سہولت کے پیش نظر ڈیڈلائن بڑھانے کی ہدایت کی تھی۔
مکیش چاؤلہ کا کہنا ہے کہ سیکیورٹی فیچرڈ نمبر پلیٹس کے استعمال سے صوبے میں سیکیورٹی کی صورتحال مزید بہتر ہوگی، کیونکہ یہ پلیٹس سیف سٹی پروجیکٹ سے منسلک ہیں۔
وزیر ایکسائز نے پہلے ہی شہریوں کے لیے نئی نمبر پلیٹس کا استعمال لازمی قرار دیا تھا۔
شہریوں نے سندھ حکومت کے اس فیصلے کو سراہتے ہوئے اسے عوام دوست اقدام قرار دیا ہے۔
سندھ حکومت کی جانب سے شہریوں سے اپیل کی گئی ہے کہ وہ مقررہ تاریخ تک اپنی گاڑیوں پر سیکیورٹی فیچرڈ نمبر پلیٹس لازمی لگوائیں تاکہ سیف سٹی پروجیکٹ کے تحت سیکیورٹی اقدامات کو موثر بنایا جا سکے۔
