باجوڑ میں گزشتہ روز قتل ہونے والے اے این پی رہنما مولانا خان زیب کی نماز جنازہ ادا کردی گئی۔ جس میں ہزاروں افراد نے شرکت کی۔ مولانا خان زیب کو آبائی علاقہ ناوگئی میں سپردخاک کردیا گیا۔
عوامی نیشنل پارٹی علماء امور کے سیکرٹری و سابق امیدوار قومی اسمبلی مولانا خان زیب کی نماز جنازہ آبائی علاقہ ناوگئی میں ادا کردی گئی۔ نماز جنازے میں اے این پی کے صوبائی صدر میاں افتخار حسین، سردار حسین بابک ، باجوڑ کے اراکین اسمبلی نثار باز ، ڈاکٹر حمید ، انور زیب خان ، مختلف اضلاع سے قبائلی و سیاسی مشران ، کارکنان اور ہزاروں کی تعداد میں عوام نے شرکت کی۔
اس سے قبل شہید ہونیوالے پولیس اہلکار شیرزادہ کی جنازہ بھی ادا کی گئی جس میں ہزاروں افراد نے شرکت کی۔
وزیراعظم شہباز شریف نے باجوڑ میں اے این پی رہنما مولانا خان زیب کے قتل پر گہرے دکھ اور افسوس کا اظہار کیا ہے۔ وزیراعظم نے اسے بزدلانہ اور ٹارگٹ حملہ قرار دیا۔
وزیراعظم شہباز شریف نے باجوڑ میں مولانا خان زیب کے قتل پر افسوس کا اظہار کرتے ہوئے کہا ہے کہ مرحوم ایک نہایت نیک انسان اور امن کے پُرجوش حامی تھے۔ وزیراعظم نے مولانا خان زیب کے اہل خانہ، ساتھیوں اور باجوڑ کے عوام سے دلی تعزیت اور مرحوم کی مغفرت کی دعا کی۔
