پاکستان نے افغانستان میں پائیدار امن و استحکام کی خاطر تعمیری کردار ادا کیلئے اپنے عزم کا اعادہ کیا ہے۔
افغانستان کی صورتحال پر اقوام متحدہ کی سلامتی کونسل کے اجلاس سے خطاب کرتے ہوئے پاکستان کے مستقل مندوب عاصم افتخار احمد کا کہنا تھا کہ مشکل حالات میں افغان صورتحال کی بحالی کی کوششوں کو سراہتے ہیں، جب سے عبوری حکام نے اقتدار سنبھالا ہے ، تقریباً 4 سال گزر چکے ہیں، افغانستان کی صورتحال بدستور غیر مستحکم ہے اور افغان عوام کی حالت مزید بگڑ چکی ہے، پابندیوں ، دہشتگردی ، منشیات اور انسانی حقوق کی خلاف ورزیوں نے صورتحال کو ابتر کر دیا ہے۔
پاکستانی مندوب کا کہنا تھا کہ کچھ چیلنجز افغانستان کے پرتشدد ماضی کی میراث ہیں، 2025ء کا انسانی ضروریات اور امدادی منصوبہ بری طرح فنڈز کی کمی کا شکار ہے، عالمی برادری کو چاہیے کہ وہ افغان عوام کے منصوبے کو غیر مشروط طور پر فنڈز دے۔
عاصم افتخار احمد کا کہنا تھا کہ افغانستان کی معیشت مستحکم کرنے اور مالی اثاثے منجمد کرنے سے متعلق مکینزمز کی حمایت کرتے ہیں، اپنی معاشی مجبوریوں کے باوجود پاکستان عملی روابط پر قائم ہے اور پاکستان افغانستان کی سب سے بڑی برآمدی اور اہم درآمدی ذریعہ بھی ہے۔
ان کا کہنا تھا کہ اقوام متحدہ کی کوششوں بشمول دوحہ عمل کا خیر مقدم کرتے ہیں، افغانستان کے اندرونی مسائل کا اثر پورے خطے پر پڑ رہا ہے، پاکستان نے کئی دہائیوں سے لاکھوں افغان مہاجرین کی میزبانی کی ہے، اگست 2021 سے اب تک مزید 10 لاکھ سے زائد غیر دستاویزی افراد پاکستان میں داخل ہو چکے ہیں، عالمی برادری کو یہ بوجھ منصفانہ طور پر بانٹنا چاہیے۔
انہوں نے کہا کہ افغانستان سے پیدا ہونے والی دہشتگردی ہمسایہ ممالک خصوصاً پاکستان کیلئے شدید خطرہ بنی ہے، افغانستان کو کسی بھی ملک کیخلاف دہشت گردی کی پناہ گاہ نہیں بننا چاہیے، کالعدم ٹی ٹی پی تقریباً 6 ہزار جنگجوؤں کے ساتھ سب سے بڑی دہشتگرد تنظیم ہے، ان دہشتگردوں نے بین الاقوامی افواج کے انخلا کے بعد جدید ہتھیاروں کو اپنے قبضے میں لے لیا ہے۔
پاکستانی مندوب کا کہنا تھا کہ ٹھوس شواہد ہیں کہ کالعدم ٹی ٹی پی کا دیگر گروہوں کے ساتھ تعاون جاری ہے اور اس تعاون کا مقصد اسٹریٹجک انفراسٹرکچر اور ترقیاتی منصوبوں کو سبوتاژ کرنا ہے، سمجھتے ہیں کہ عبوری حکام کو بین الاقوامی ذمہ داریاں نبھانا ہوں گی۔
انہوں نے کہا کہ پاکستان افغان نوجوانوں کیلئے تعلیمی مواقع کی حمایت جاری رکھے ہوئے ہے، پاکستان ایک مستحکم، پُرامن اور خوشحال افغانستان کا خواہاں ہے، عالمی برادری کی جانب سے عبوری حکام سے روابط کیلئے حمایت جاری رکھیں گے، افغانستان میں پائیدار امن و استحکام کی خاطر تعمیری کردار ادا کیلئے پرعزم ہیں۔
ان کا مزید کہنا تھا کہ ایران میں اسرائیل کے بلا جواز حملوں کے بعد ممکنہ غیر مستحکم صورتحال پر تشویش ہے۔
