کوئٹہ میں لے پالک بھائی نے پیسوں کی لالچ میں اپنے دو بھائیوں کو قتل کر دیا۔
پولیس نے دونوں کی لاشیں 11 ماہ بعد ایک کرائے کے مکان سے برآمد کرلیں۔ پولیس کے مطابق دونوں نوجوانوں کو تیز دھار ہتھیار سے قتل کیا گیا۔ ملزم نے ان کی لاشوں کے ٹکڑے کر کے کمرے کے فرش کے نیچے دفنایا اور چند دن بعد مکان خالی کر کے کہیں اور منتقل ہو گیا۔ اس دوران وہ رشتہ داروں کو بتاتا رہا کہ دونوں بھائی لاہور میں تعلیم حاصل کر رہے ہیں۔
ایس ایچ او انڈسٹریل تھانہ شاہنواز مینگل نے بتایا کہ یہ راز اس وقت کھلا جب ملزم کی سابقہ بیوی نے پولیس کو اطلاع دی۔ پولیس نے ملزم کو گرفتار کیا جس نے دوران تفتیش قتل کا اعتراف کیا۔ اس کی نشاندہی پر پولیس نے مکان میں کھدائی کی اور دونوں بھائیوں کی ہڈیوں پر مشتمل باقیات برآمد کیں۔
ابتدائی تحقیقات سے معلوم ہوا کہ تینوں بھائیوں کو والدین کی طرف سے وراثت میں ایک پلاٹ ملا تھا جو 90 لاکھ روپے میں فروخت ہوا۔ رقم مشترکہ اکاؤنٹ میں رکھی گئی اور ملزم کو بھی اس کا حصہ دیا گیا۔
ملزم نے اعتراف کیا کہ وہ جوا کھیلنے کا عادی تھا اور اپنا حصہ ہارنے کے بعد باقی رقم ہتھیانے کے لیے اس نے اپنے دونوں بھائیوں کو قتل کر دیا۔پولیس نے واقعہ کی تفتیش شروع کردی۔
