مشرق وسطیٰ میں جاری کشیدگی کے تناظر میں امریکی محکمہ خارجہنے اپنے شہریوں کو ایران اور عراق کا سفر نہ کرنے کی سخت ہدایت جاری کر دی ہے۔
ترجمان کے مطابق یہ فیصلہ امریکی شہریوں کے تحفظ کو یقینی بنانے کے لیے کیا گیا ہے، جو محکمہ خارجہ کی اولین ترجیح ہے۔
بیان میں کہا گیا ہے کہ ایران میں موجودہ سیکیورٹی صورتحال انتہائی غیر مستحکم ہے، اس لیےتمام امریکیوں کو وہاں کا سفر کرنے سے گریز کرنا چاہیے، چاہے وہ ذاتی ہو یا کاروباری نوعیت کا ہو اسی طرح عراق کے لیے بھی خطرے کا انتباہ جاری کیا گیا ہے۔
محکمہ خارجہ کے مطابق مشرق وسطیٰ میں موجود امریکیوں کی حفاظت کے لیے ایک خصوصی ٹاسک فورس تشکیل دی گئی ہے جو فوری معاونت فراہم کرنے کے لیے کام کر رہی ہے۔ مزید یہ کہ اگر کسی شہری کو سفر انتہائی ناگزیر ہو تو وہ پہلے امریکی سفارتخانے یا قونصلیٹ سے رابطہکرے۔
محکمہ خارجہ نے امریکی شہریوں کو تاکید کی ہے کہ وہ تمام موجودہ ایڈوائزری پر عمل کریں اور خطے کی صورت حال سے باخبر رہیں تاکہ کسی ممکنہ خطرے سے بچا جا سکے۔
