کوئٹہ کے مختلف علاقوں میں پیٹرول کی قلت شدت اختیار کرگئی۔ شہر کے متعدد پیٹرول پمپس بند پڑے ہیں جبکہ کھلے پمپس پر گاڑیوں اور موٹرسائیکلوں کی لمبی قطاریں لگ گئیں۔
کوئٹہ میں پیٹرول کا بحران شدت اختیار کرگیا۔ شہر کے بیشتر پیٹرول پمپ بند پڑے ہیں۔ جہاں پیٹرول دستیاب ہے، وہاں لوگوں کی لمبی قطاریں لگی ہوئی ہیں۔ گاڑی سواروں سے لے کر موٹرسائیکل چلانے والوں تک ۔۔ ہر کوئی ایندھن کے حصول کی جدوجہد میں مصروف ہے۔
شہری کہتے ہیں کہ شہر کے بیشتر پیٹرول پمپ رکاوٹیں کھڑی کرکے بند کردیے گئے ہیں، پیٹرول نہ ملنے سے سخت پریشانی ہے۔ پمپس مالکان کا مؤقف ہے کہ پیٹرولیم مصنوعات کی سپلائی میں کمی اور مانگ میں اضافہ ہوا ۔ جس کے باعث قلت نے جنم لیا۔
ترجمان حکومت بلوچستان شاہد رند کا کہنا ہے کہ کوئٹہ یا بلوچستان میں پیٹرول کا کوئی بحران نہیں۔ غیرقانونی ایرانی پیٹرول کی اسمگلنگ کے خلاف کریک ڈاؤن جاری ہے۔ جس کی وجہ سے مصنوعی قلت کا تاثر دیا جارہا ہے۔
