سینیٹر فیصل واوڈا کا کہنا ہے کہ پاک فوج نے کم وسائل میں بھارت کے خلاف بڑا معرکہ مارا ۔ ترجیحی بنیادوں پر دفاعی بجٹ بڑھانے اور ترقیاتی بجٹ روک کر فوج کی تنخواہوں کو دگنا کرنا ہوگا۔
سینیٹ اجلاس میں اراکین کی جانب سے خضدار میں اسکول بس پر حملے کی شدید مذمت کی گئی اور بھارتی پراکسیز کو جڑ سے اکھاڑ پھینکنے کے عزم کا اعادہ کیا گیا۔ ارکان نے جنرل عاصم منیر کو فیلڈ مارشل بنانے پر وزیراعظم کو خراج تحسین کیا۔
سینیٹر فیصل واوڈا نے کہا کہ فیلڈ مارشل عاصم منیر نے بھارت میں سویلینز کو نشانہ نہ بنانے کا حکم دیا۔ پاک فوج نے کم وسائل میں بھارت کے خلاف بڑا معرکہ مارا۔ بھارت کے مقابلے کیلئے حکمت عملی پر بھی پیسہ خرچ کرنا ہوگا، افواج کی تنخواہیں ہمیں دگنا کرنا پڑیں گی، ترقی کے بجائے ہمیں دفاع کی بات کرنا پڑے گی۔
سینیٹر فیصل واوڈا نے دفاعی بجٹ میں 3گنا اضافے کی تجویز پیش کردی، کہا ہمیں اپناپیٹ کاٹ کر دفاعی بجٹ کو2، 3گناکرنا پڑے گا، دفاع میں معمولی کمزوری دکھائی تو جنگ جیتنے کا اثر آگے نہیں رہے گا، دیکھا جائے دفاعی بجٹ کو دو تین گنا کیسے کیا جائے۔
انہوں نے کہا کہ حکومت دل بڑا کرے اور اپوزیشن کے ساتھ اختلافات طے کرے، بلاول بھٹو وفد کی صورت میں دنیا کو آگاہ کریں گے، اس جنگ کومنطقی انجام تک پہنچائیں گے، ہم گھس کرماریں گے،انہیں جواب دیں گے، ہم محفوظ ہاتھوں میں ہیں اورمتحد ہیں۔
فیصل واوڈا کا مزید کہنا تھا کہ سفارتی اور معاشی میدان میں بھی جنگ جیتنی ہے، سب ایک جھنڈے تلے کھڑے ہوگئے، ہم نےبھارت سےہر محاذ پر جنگ جیتی، بھارت نے اسکول کے بچوں پر گھٹیا حملہ کیا، ہم پرامن لوگ ہیں، جنگ نہیں چاہتے مگر معصوم بچوں کی شہادت کورائیگاں نہیں جانے دیں گے۔
