اسلامک ڈیویلپمنٹ بینک گروپ کا سالانہ اجلاس الجزائر میں شروع ہوگیا۔ جس میں 57 ممبر ممالک کے وزرا سمیت عالمی مالیاتی اداروں کے سربراہان اور دیگر شراکت دار حصہ لے رہے ہیں۔
اجلاس کا مقصد ممبر ممالک میں سماجی اور معاشی مسائل کے پائیدار حل کیلئے تجاویز پیش کرنا ہے۔ سالانہ اجلاس 19 مئی سے 22 مئی تک جاری رہے گا۔ اجلاس کے پہلے دن یوتھ ڈیویلپمنٹ فورم کا انعقاد کیا گیا جس میں نوجوانوں کو درپیش مسائل پر گفتگو کی گئی اور مستقبل کے چیلنجز کا سامنا کرنے کیلئے نوجوانوں کو ہنرمند بنانے پر زور دیا گیا۔ اس کے علاوہ چھوٹے کاروباروں کو فروغ دینے کیلئے ڈیجیٹل سلوشنز کی ضرورت پربھی سیمینار کا انعقاد کیا گیا۔
اس موقع پر اسلامک ڈیویلپمنٹ بینک کے بورڈ گورنرز کا پچاسواں اجلاس بھی ہورہا ہے۔ جو اسلامک فنانس اور پائیدار ترقی کے فروغ کیلئے ادارے کی کوششوں میں ایک اہم سنگ میل ہے۔
الجزائر اسلامک ڈیویلپمنٹ بینک کے بانی ارکان میں سے ہے۔ جو تیسری بار سالانہ اجلاس کی میزبانی کررہا ہے۔ اس سے پہلے 1990 اور 2001 میں الجزائر سالانہ اجلاس کی میزبانی کرچکا ہے۔
