اقتصادی رابطہ کمیٹی ( ای سی سی ) نے ڈسکوز کی ماہانہ کارکردگی پر نگرانی کا نظام نافذ کرنے کا فیصلہ کرلیا۔
پیر کو وفاقی وزیر خزانہ محمداورنگزیب کی زیرصدارت اقتصادی رابطہ کمیٹی کا اجلاس ہوا جس میں ایس این جی پی ایل کیلئے ضمانتوں میں جون 2026 تک توسیع کی منظوری دی گئی اور یہ گارنٹیز ایل این جی کیلئے بینکوں سے حاصل کردہ 50 ارب کی رننگ فنانس سہولت کے تحت دی گئیں۔
اجلاس کے جاری کردہ اعلامیہ کے مطابق بلوچستان کے 27 ہزار زرعی ٹیوب ویلز کی سولرائزیشن کیلئے 24.5 ارب جاری کرنےکی منظوری دی گئی جبکہ ای سی سی نے سولرائزیشن منصوبے کی مؤثر نگرانی کی ہدایت بھی کردی ہے۔
اعلامیہ کے مطابق کابینہ ڈویژن کیلئے 30 کروڑ کی تکنیکی ضمنی گرانٹ، صادق پبلک اسکول بہاولپورکی اپ گریڈیشن کیلئے 25 کروڑ روپے اور اقوام متحدہ امن مشن کیلئے پولیس یونٹ کو 10.9 کروڑ روپے کی منظوری بھی دی گئی۔
فرنٹیئر کور شمال کیلئے 50 کروڑ روپے کے فنڈز ، سیسنا طیارے کی مرمت کیلئے 2.59 کروڑ روپے کے اجراء، مچنی ٹریننگ سنٹر خیبرپختونخوا کیلئے 23 لاکھ روپے اور 36 ان لینڈ ریونیو ٹریبونل بینچز کیلئے 55.68 کروڑ روپے منظور کئے گئے۔
اعلامیہ کے مطابق 8.8 کروڑ پنکھوں کی تبدیلی پروگرام کیلئے 10.6 کروڑ روپے کی گرانٹ منظور کی گئی۔
اجلاس میں ڈسکوز کی گورننس میں بہتری اور تمام بورڈز کی تشکیل نو مکمل کرنے کی سمری منظور کی گئی۔
اجلاس کو بریفنگ دی گئی کہ سیپکو اور حیسکو کے بورڈز کی تشکیل کا عمل آخری مراحل میں ہے۔
