واٹس ایپ نے اپنے اینڈرائیڈ ڈیوائسز کے بیٹا ورژن میں چیٹ میسجز اور چینل اپ ڈیٹس کے ٹیکسٹ کا ترجمہ کرنے والا نیا فیچر متعارف کرا دیا ہے جس پر گزشتہ سال سے کام جاری تھا۔
WABetaInfo کی رپورٹ کے مطابق یہ فیچر فی الحال کچھ بیٹا صارفین کے لیے دستیاب ہے اور آئندہ چند ہفتوں میں اسے دیگر بیٹا صارفین تک بتدریج توسیع دی جائے گی۔
یہ فیچر اسپینش، عربی، ہندی اور روسی زبانوں کے ترجمے کو سپورٹ کرتا ہے۔
اس کی سب سے بڑی خاصیت یہ ہے کہ ترجمے کے لیے انٹرنیٹ کنکشن کی ضرورت نہیں ہوگی اور صارفین کو صرف مطلوبہ زبان کا لینگوئج پیک ڈاؤن لوڈ کرنا ہوگا جس کے بعد وہ آف لائن بھی پیغامات کا ترجمہ کر سکیں گے۔
یہ لینگوئج پیک خودکار طور پر زبان کی شناخت کرکے آنے والے پیغامات کا ترجمہ بھی کرسکتا ہے۔
صارفین کو اس فیچر کو خود ان ایبل کرنا ہوگا جس کے لیے انہیں واٹس ایپ کی سیٹنگز میں چیٹ سیکشن میں جا کر اسے فعال کرنا ہوگا، وہاں وہ یہ بھی منتخب کر سکیں گے کہ کس زبان کے میسجز کا خودکار ترجمہ کرنا ہے۔
یہ فیچر ون آن ون اور گروپ چیٹس دونوں کے لیے استعمال کیا جا سکے گا۔
اگر صارف خودکار ترجمہ نہیں چاہتے تو وہ میسج آپشنز میں جا کر "ٹرانسلیٹ" پر کلک کرکے دستی طور پر ترجمہ کر سکتے ہیں۔
رپورٹ کے مطابق واٹس ایپ یہ ترجمہ ڈیوائس پر لائٹ ویٹ لینگوئج پیکس کے ذریعے کرے گا اس لیے صارفین کو اس پر مکمل بھروسا نہیں کرنا چاہیے تاہم، واٹس ایپ صارفین کے فیڈ بیک کی روشنی میں ترجمے کے معیار کو بتدریج بہتر بنانے پر کام کرے گا۔
