مسلم لیگ ن کےصدرنوازشریف نے کہاہے کہ پاکستان اختراعی تبدیلیوں کا شراکت داربننے کے لئے تیارہے۔ پاکستان کو دورجدید کے تقاضوں کے مطابق تیزی سے بدلتی ہوئی ٹیکنالوجیز کو اپنانا ہوگا۔
مسلم لیگ (ن) کے صدر نوازشریف اور وزیراعلیٰ پنجاب سےعالمی کرپٹو کرنسی ایکسچینج بائنینس کے سابق سی ای او اور بانی چانگ پنگ ژاؤنے ملاقات کی ۔پاکستان کرپٹو کونسل کے سی ای او بلال بن ثاقب بھی ملاقات میں موجود تھے۔نواز شریف اور مریم نواز نےچانگ پنگ ژاؤکی پاکستان کرپٹو کونسل کے سٹریٹجک ایڈوائزر کے طورپر تقررکا خیر مقدم کیا۔
ملاقات میں ملک میں ڈیجیٹل اکانومی پر تبادلہ خیال اور اختراعی علوم کے ذریعے ترقی کے ویژن کو اپنانے پر اتفاق کیا گیا۔بائنینس کے بانی نے نوازشریف کے ایمرجنگ ٹیکنالوجیز کے فروغ کے وژن کو خراج تحسین پیش کیا ۔وزیراعلیٰ پنجاب مریم نواز کا کہنا تھا کہ نوجوانوں کو آئی ٹی سکلز سکھا کر عالمی ڈیجیٹل مارکیٹ کے لئے تیار کررہے ہیں پنجاب مستقبل کی ٹیکنالوجیز کو اپنانے کے لئے بالکل تیار ہے۔ہماری پوری توجہ نالج بیسڈ ٹیکنالوجی پر مرکوز ہے۔
ملاقات میں ڈیجیٹل اثاثہ جات اور فیوچرٹیکنالوجی میں نوجوانوں کی شراکت کے امور پر بھی گفتگو کی گئی ۔چانگ پنگ زاؤ نے ابھرتی بلاک چین ٹیکنالوجی اورگلوبل انٹر پرینیور شپ کے امکانات سے آگاہ کیا۔ڈیجیٹل ٹرانسفارمیشن کے لئے جدید علوم کے رجحانات کے فروغ پر اتفاق کیا گیا۔
