سری لنکا سے تعلق رکھنے والی بالی ووڈ کی نامور اداکارہ جیکولین فرنانڈس کی والد کِم فرنانڈس انتقال کر گئیں۔
بھارتی میڈیا رپورٹس کے مطابق بالی ووڈ اداکارہ جیکولین فرنانڈس کی والدہ کا انتقال ہفتہ کی شب ممبئی کے لیلاوتی اسپتال میں ہوا، کِم فرنانڈس کو 24 مارچ کو دل کا دورہ پڑا تھا جس کے بعد سے وہ اسپتال میں زیر علاج تھیں۔
جیکولین فرنانڈس والدہ کے آخری ایام میں ان کے ساتھ ہی تھیں، اداکارہ نے والدہ کی علالت کے باعث گزشتہ ماہ آئی پی ایل کی افتتاحی تقریب میں پرفارم کرنے سے بھی معذرت کرلی تھی۔
رپورٹ کے مطابق کِم فرنانڈس ملائیشین اور کینیڈین نژاد تھیں وہ بحرین میں ایک ایئر ہوسٹس کے طور پر کام کرچکی ہیں، ان کی ملاقات 1980ء کی دہائی میں ایک سری لنکن شہری ایلروئے فرنانڈس سے ہوئی تھی۔
بھارتی میڈیا کے مطابق 1985ء میں پیدا ہونیوالی جیکولین اپنے والدین کے چار بچوں میں سب سے چھوٹی ہیں جن میں 2 بھائی اور ایک بہن شامل ہیں۔
جیکولین فرنانڈس نے بالی ووڈ میں 2009ء کی فینٹسی ایکشن کامیڈی فلم الہ دین سے ڈیبیو کیا تھا۔
