برطانوی پارلیمنٹ نے پاکستانی اداکارہ بشریٰ انصاری، ماہرہ خان، ہانیہ عامر اور فہد مصطفیٰ کے بعد فیروز خان کو بھی ’’اسٹاف آف پاکستان‘‘ ایوارڈ سے نواز دیا۔
فیروز خان کو ’اسٹار آف پاکستان‘ ایوارڈ سے نوازے جانے کی تقریب ہاؤس آف لارڈز میں منعقد ہوئی، جہاں اداکار نے اپنی اہلیہ ڈاکٹر زینب کے ہمراہ شرکت کی۔
رپورٹ کے مطابق تقریب کا انعقاد بھارتی نژاد برطانوی لارڈ کلدیپ سنگھ سہوٹا اور بیرونس کی جانب سے کیا گیا، جس میں دیگر برطانوی ارکان پارلیمنٹ نے بھی شرکت کی۔
ایوارڈ تقریب میں پاکستانی اور بھارتی نژاد شائقین نے بھی شرکت کی جبکہ میڈیا اور سوشل میڈیا سے تعلق رکھنے والے افراد بھی تقریب میں شریک ہوئے۔
فیروز خان نے ایوارڈ تقریب سے خطاب میں برطانوی پارلیمنٹ اور خصوصی طور پر تقریب کا انعقاد کرنے والے ارکان کا شکریہ ادا کرتے ہوئے ایوارڈ کو اپنے لیے اعزاز قرار دیا۔
ایوارڈ وصول کرنے کے بعد فیروز خان اور ان کی اہلیہ نے برطانوی پارلیمنٹ کے احاطے میں ایوارڈ کے ساتھ ویڈیوز اور تصاویر بھی بنوائیں۔
فیروز خان کو ’اسٹار آف پاکستان‘ کا ایوارڈ دیے جانے سے چند دن قبل ہی اداکارہ ہانیہ عامر بشریٰ انصاری، ماہرہ خان اور فہد مصطفیٰ کو بھی ایوارڈز سے نوازا گیا تھا۔
