نیشنل یونیورسٹی آف میڈیکل سائنسز اور آغا خان یونیورسٹی کے اشتراک سے پاکستان میں کلینیکل ٹرائلز کے فروغ کیلئے کلینیکل ٹرائلز سمٹ آف پاکستان 2025ء کا انعقاد کیا گیا۔
راولپنڈی اور کراچی میں منعقدہ 5 روزہ کانفرنس نے پاکستانی اور بین الاقوامی ماہرین کو تحقیق اور تجربات کے تبادلے کا پلیٹ فارم فراہم کیا۔
آرمی میڈیکل کالج، راولپنڈی میں 14 فروری کو کانفرنس سمپوزیم کا بھی انعقاد کیا گیا، جس میں لیفٹیننٹ جنرل ارشد نسیم نے بطور مہمانِ خصوصی شرکت کی۔
تقریب کے مہمانِ خصوصی لیفٹیننٹ جنرل ارشد نسیم، سرجن جنرل پاکستان آرمی، نے اجتماع سے خطاب کرتے ہوئے کہا کلینیکل ٹرائلز جدید طب کی بنیاد ہیں، جو علاج کے طریقوں اور انسانی زندگیوں میں انقلابی تبدیلیاں لا رہے ہیں، پاکستان کیلئے یہ محض جدت کا ذریعہ نہیں، بلکہ ہمارے مخصوص صحت عامہ کے چیلنجز سے نمٹنے کا ایک مؤثر راستہ بھی ہے۔
سی ٹی ایس پی 2025ء کی کانفرنس میں ملکی و غیر ملکی ماہرین نے طبی تحقیق اور کلینیکل ٹرائلز کے شعبے میں تعاون پر گفتگو کی۔ ڈاکٹر عبدالرشید عبدالرحمٰن (ملائیشیا)، ڈاکٹر شیلاں صدیقی (کینیڈا)، ڈاکٹر کیرن والش (برطانیہ)، ڈاکٹر کرسٹین سین (امریکہ) اور ڈاکٹر سعید حامد (پاکستان) نے سمٹ میں شرکت کی۔
کانفرنس کے اختتام پر لیفٹیننٹ جنرل (ر) وسیم عالمگیر اور مہمانِ خصوصی نے معزز مقررین کو ان کی خدمات کے اعتراف میں یادگاری شیلڈز پیش کیں۔
سی ٹی ایس پی 2025ء جیسے ایونٹس پاکستان کو عالمی کلینیکل ریسرچ نیٹ ورک سے جوڑنے اور بین الاقوامی ماہرین کے ساتھ تعاون کے مواقع فراہم کرتے ہیں۔
