ملک میں پٹرولیم مصنوعات کی فروخت میں جاری مالی سال کے پہلے 7 ماہ میں سالانہ بنیاد پر 4 فیصد اضافہ ریکارڈ کیا گیا۔
انڈسٹری کے اعدادوشمار کے مطابق مالی سال کے پہلے 7 ماہ میں ملک میں 9.41 ملین ٹن پٹرولیم مصنوعات کی فروخت ریکارڈ کی گئی جو گزشتہ مالی سال کی اسی مدت کے مقابلے میں 4 فیصد زیادہ ہے، گزشتہ مالی سال اسی مدت میں ملک میں 9.07 ملین ٹن پٹرولیم مصنوعات کی فروخت ریکارڈکی گئی تھی۔ جنوری میں 1.38 ملین ٹن پٹرولیم مصنوعات کی فروخت ریکارڈکی گئی جو گزشتہ سال جنوری کے برابر ہے۔
دسمبر کے مقابلے میں جنوری میں پٹرولیم مصنوعات کی فروخت میں ماہانہ بنیاد پر 8فیصد اضافہ ریکارڈکیاگیا ۔ دسمبر میں ملک میں 1.28 ملین ٹن پٹرولیم مصنوعات کی فروخت ہوئی جو جنوری میں بڑھ کر 1.38 ملین ٹن ہو گئی۔ جاری مالی سال کے پہلے 7 ماہ میں پٹرول کی فروخت کا حجم 4.37 ملین ٹن، ہائی سپیڈ ڈیزل 4.06 ملین ٹن اور فرنس آئل کی فروخت کا حجم 0.41 ملین ٹن ریکارڈکیاگیا۔
پہلے 7 ماہ میں پی ایس او کی پٹرولیم مصنوعات کی فروخت کا حجم 4.28 ملین ٹن، اٹک پٹرولیم 0.83 ملین ٹن، شیل 0.68 ملین ٹن اور حیسکول کی پٹرولیم مصنوعات کی فروخت کا حجم 0.30 ملین ٹن ریکارڈ کیا گیا۔
