امریکی وزیر خارجہ انٹونی بلنکن تین روزہ دورے پر چین پہنچ گئے۔
غیر ملکی میڈیا رپورٹس کے مطابق انٹونی بلنکن اپنے دورہ چین کے دوران اپنے ہم منصب وزیر خارجہ وانگ یی اور صدر شی جن پنگ کے ساتھ ملاقات کریں گے جبکہ چینی کاروباری برادری کے ساتھ بھی ان کی ملاقات متوقع ہے۔
بیجنگ اور واشنگٹن کے مطابق بلنکن کا دورہ دونوں ممالک کے درمیان بات چیت کو مضبوط بنانے اور اپنے دو طرفہ تعلقات کو مستحکم کرنے کے بارے میں ہے۔
یہ دورہ امریکی سینیٹ کی جانب سے ایک بڑے غیر ملکی امدادی پیکج کے حق میں ووٹ دینے کے دوران سامنے آیا جس میں تائیوان اور وسیع تر ایشیا پیسیفک میں چینی خطرات کا مقابلہ کرنے کے لیے آٹھ بلین ڈالر مختص کیے گئے ہیں۔
علاوہ ازیں امریکی سینیٹ نے قومی سلامتی کے خدشات کے پیش نظر امریکا میں مختصر ویڈیو شیئرنگ پلیٹ فارم ٹک ٹاک پر پابندی کا بل بھی منظور کرلیا ہے۔
لازمی پڑھیں۔ امریکی کانگریس نے ٹک ٹاک پر پابندی کا بل منظور کرلیا
بلنکن نے گزشتہ ہفتے اپنے بیان میں کہا تھا کہ چین ایک طرف یورپ اور دیگر ممالک کے ساتھ اچھے تعلقات کا خواہاں ہے تو دوسری طرف وہ اس چیز کو ہوا نہیں دے سکتا جو سرد جنگ کے خاتمے کے بعد سے یورپی سلامتی کے لیے سب سے بڑا خطرہ ہے۔
چینی وزارت خارجہ کے ترجمان وانگ وین بن نے منگل کے روز کہا تھا کہ چین اور روس کے درمیان معمول کے اقتصادی اور تجارتی تبادلوں کے خلاف بے بنیاد الزامات لگاتے ہوئے امریکا کا یوکرین کے لیے بڑے پیمانے پر امدادی بل متعارف کروانا انتہائی منافقانہ اور غیر ذمہ دارانہ ہے۔