تائیوان میں زلزلے کے شدید جھٹکے محسوس کیے گئے۔
غیر ملکی میڈیا رپورٹس کے مطابق تائیوان میں پیر کی شام اور منگل کی صبح کے درمیان کئی گھنٹوں کے دوران شدید زلزلے کے جھٹکے محسوس کیے گئے۔
واضح رہے کہ یہ زلزلہ تقریباً تین ہفتے قبل 7.4 شدت کے ایک طاقتور زلزلے کے بعد آیا جس سے کم از کم 17 افراد ہلاک ہوئے۔
رپورٹس کے مطابق پہلے زلزلہ 5.5 کی شدت کا تھا جو پیر کی شام مشرقی کاؤنٹی ہوالین میں محسوس کیا گیا جو 3 اپریل کے زلزلے کا مرکز تھا، اس کے بعد چھوٹے جھٹکے محسوس کیے گئے۔
شدید ترین زلزلہ کئی گھنٹے بعد آیا جس کی شدت تائی پے کے سنٹرل ویدر ایڈمنسٹریشن کے زلزلہ پیما مرکز کے مطابق 6.3 ریکارڈ کی گئی۔
ہوالین کاؤنٹی میں حکام کا کہنا تھا کہ 3 اپریل کو آنے والے زلزلے میں شدید نقصان پہنچانے والی دو عمارتیں منگل کی صبح آنے والے زلزلے کے بعد جزوی طور پر منہدم ہو گئیں۔
سنٹرل ویدر ایڈمنسٹریشن کے زلزلہ پیما مرکز کا کہنا ہے کہ یہ زلزلے 3 اپریل کی تباہی کے آفٹر شاکس تھے۔
نئے زلزلوں سے کسی جانی نقصان کی اطلاع نہیں ہے تاہم، ہوالین میں اسکولوں اور دفاتر کو بند کرنے کا حکم دیا گیا۔
یاد رہے کہ 3 اپریل کو آنے والا زلزلہ تائیوان میں 25 سال قبل آنے والے 7.7 شدت کے زلزلے کے بعد سب سے زیادہ طاقتور تھا جس میں 2 ہزار 400 افراد ہلاک اور ہزاروں عمارتوں کو تباہ یا نقصان پہنچا تھا۔