سری لنکا نے پاکستانیوں کے ویزوں کی رکاوٹیں ختم کردیں۔ سری لنکا نے پاکستان کو فوری طور پر تمام منفی ویزا فہرستوں سے کلیئر کردیا۔
وفاقی وزیرداخلہ محسن نقوی کی سری لنکا کے صدر انورا کمارا ڈسانائیکے سے اہم ملاقات میں پاکستانیوں کی ویزا مشکلات کی شکایت پر میزبان صدر نے پاکستان کو تمام منفی لسٹوں سے فوری نکلانے کا حکم جاری کر دیا۔ وفاقی وزیر سمندر پار پاکستانیز چوہدری سالک حسین بھی ملاقات میں موجود تھے۔
ملاقات میں انسداد دہشت گردی، انسداد منشیات اور فورسز کی مشترکہ تربیت کے امور پر بات چیت ہوئی، محسن نقوی نے وزیراعظم کی جانب سےسری لنکن صدر کو دورہ پاکستان کی دعوت دی۔
سری لنکن صدر انورا کمارا نے بھارت کے خلاف کولمبو میں میچ کھیلنے کے فیصلے پر وزیر اعظم شہباز شریف سے اظہار تشکر کیا۔ پاک سری لنکا تعلقات مضبوط تر بنانے کے عزم کا اعادہ کیا یہ بھی کہا کہ سری لنکا کی وزیر اعظم جلد پاکستان کا دورہ کریں گی۔
