پشاور کور ہیڈ کوارٹرز میں ہونےوالے اہم اجلاس میں ملا کنڈ ڈویژن میں فوج کی ذمہ داریاں صوبائی اداروں کے حوالے کرنے کا فیصلہ کیا گیا۔
خیبرپختونخوا میں امن وامان کی صورتحال پر اجلاس کے میڈیا سے گفتگو میں معاونِ خصوصی اطلاعات شفیع جان نے کہا کہ اجلاس میں معیشت اور امن وامان سے متعلق اہم فیصلے ہوئے، متاثرہ علاقوں میں امن وامان بہتر ہوتے ہی سروسز سول انتظامیہ کے حوالے کی جائیں گی۔ پی ایس ایل کے میچز اس بار پشاور میں بھی ہوںگے۔
آفتاب عالم نے کہا کہ اجلاس میں امن و امان سے متعلق اہم اورتاریخی فیصلے کیے گئے، وزیراعلیٰ خیبرپختونخواکی موجودگی میں اجلاس میں اہم فیصلوں پراتفاق ہوا۔ ملاکنڈ ڈویژن میں پاک فوج اپنی ذمے داریاں سول انتظامیہ کے حوالے کرے گی، فیصلہ خیبرپختونخوا پولیس پراعتماد کے اظہار کا واضح ثبوت ہے۔ نیشنل اپیکس کمیٹی میں صوبائی فیصلوں کی توثیق کی جائے گی۔
مشیرخزانہ وزیراعلیٰ خیبرپختونخوا مزمل اسلم نے کہا کہ اجلاس میں خیبرپختونخوا کے مالی مسائل تفصیل سے زیربحث آئے، وزیراعظم کے سامنے صوبے کو درپیش مالی مشکلات کی تفصیلات رکھی گئیں، خیبرپختونخواکواین ایف سی کاحصہ مل جائے تومسائل حل ہوسکتے ہیں۔
