وزیراعظم شہباز شریف کا کہنا ہے کہ مسلح افواج نے بھارت کو جنگ میں زناٹے دار تھپڑ رسید کیا۔ امریکی کانگریس کی رپورٹ نے ہماری فتح پر مہر ثبت کردی۔
آزادکشمیر کے شہر باغ میں تقریب سے خطاب میں وزیراعظم کا کہنا تھا کہ جنگ میں شاہینوں کی کارکردگی نے دشمن کو گھٹنوں کے بل گرنے پر مجبور کیا۔ امریکی صدر بھی 7 بھارتی طیارے گرانے کا بار بار ذکر کرچکے۔
وزیراعظم شہباز شریف کا مزید کہنا تھا کہ جادو ٹونے اور پھونکوں سے معاملات نہیں چلتے، معاشی میدان میں دن رات محنت کررہے ہیں۔ ایک دن آئے گا جب ہماری قرضوں سے جان چھوٹ جائے گی۔
واضح رہے کہ کانگریس کی یوایس چائنا اکنامک اینڈ سیکیورٹی کمیشن کی رپورٹ میں اعتراف کیا گیا کہ مئی میں ہونے والی پاک بھارت جنگ میں بھارت کوبدترین شکست ہوئی۔ رپورٹ کے مطابق پاکستان کی فتح میں چینی ہتیھاروں نے بنیادی کردار ادا کیا۔
رپورٹ کے مطابق پاکستان نے چینی ہتھیاروں کی مدد سے فرانسیسی ساختہ رافیل طیارے مار گرائے۔ پاکستان کی کامیابی کو دیکھ کر انڈونیشیا نے رافیل طیاروں کی خریداری کا منصوبہ ختم کردیا۔ جبکہ رافیل طیاروں کی عالمی ساکھ کو بھی نقصان پہنچا۔
یاد رہے کہ مئی میں پاکستان اور بھارت کے درمیان یہ تنازع مقبوضہ کشمیر میں سیاحوں پر حملے کے بعد شروع ہوا، 4 روز تک جاری رہنے والے اس تصادم میں دونوں ممالک نے لڑاکا طیارے، میزائل، توپ خانے اور ڈرون استعمال کیے ، پاکستان نے اس نے تصادم کے دوران بھارت کے 6 لڑاکا طیارے مار گرائے تھے۔
