وزیر اعظم شہباز شریف نے دورہ قطر کے دوران امیر قطر شیخ تمیم بن حمد الثانی اور قطری ہم منصب محمد بن عبدالرحمن الثانی سے ملاقاتیں کی ہیں جن کے دوران غزہ پر اسرائیلی جارحیت روکنے، دوطرفہ تعلقات مضبوط تر بنانے، تجارت ، توانائی ، ثقافت اور دیگر شعبوں میں تعاون کے فروغ پر بات چیت اور علاقائی صورتحال ، اسٹریٹجک تعلقات اور مشترکہ اقتصادی اہداف پر تبادلہ خیال کیا گیا جبکہ قطری سرمایہ کاروں کو پاکستان میں سرمایہ کاری کی دعوت بھی دی ۔
وزیراعظم شہباز شریف کے دورہ قطر کے دوسرے روز دوحہ میں اہم ملاقاتوں کا سلسلہ جاری رہا، امیر قطر اور قطری ہم منصب سے الگ الگ ون آن ون اور پھر وفود کی سطح پر ملاقاتیں ہوئیں جن کے دوران علاقائی صورتحال ، مشترکہ اقتصادی ، تجارتی ، توانائی اور ثقافتی شعبوں میں تعاون پر بات چیت کی گئی۔
وزیراعظم نے فلسطین کے حق میں قطر کی مضبوط حمایت اور اقوام متحدہ میں فلسطینیوں کے حقوق کی وکالت پر قطری امیر کی کوششوں کو سراہا اور متاثرہ فلسطینیوں تک امداد کی فراہمی یقینی بنانے پر زور دیتے ہوئے کہا کہ غزہ میں جاری ظلم کو روکے بغیر عالمی امن ممکن نہیں۔
وزیراعظم نے علاقائی امن و استحکام کے لیے قطری ثالثی اور دیگر کوششیں ابل تعریف قرار دیں اور امیر قطر کو دورہ پاکستان کی دعوت بھی دی جسے خوش دلی سے قبول کیا گیا ۔
وزیراعظم شہباز شریف نے قطری سرمایہ کاروں کو پاکستان میں سرمایہ کاری کی دعوت دی اور بیرونی سرمایہ کاروں کو سازگار ماحول فراہم کرنے کی یقین دہانی بھی کروائی ۔
