سفارتی محاذ پر پاکستان کی مثبت پیشرفت کا سلسلہ جاری ہے، حالیہ پیش رفت میں امیر کویت اور امیر قطر نے وزیراعظم شہباز شریف کی دورہ پاکستان کی دعوت کو قبول کرلیا ہے۔
تفصیلات کے مطابق وزیراعظم شہباز شریف سے پاکستان میں کویت اور قطر کے سفراء نے علیحدہ علیحدہ ملاقاتیں کیں۔ ملاقات میں کویت کے سفیر نے وزیراعظم کو امیرشیخ مشعل الحمد الجابر الصباح کا ایک خط پیش کیا، خط میں امیر کویت کی جانب سے دورہ پاکستان کی دعوت قبول کرنے کا پیغام دیا گیا ہے۔
دوسری جانب قطر کے سفیر نے بھی وزیراعظم شہباز شریف کو شیخ تمیم بن حمد الثانی کا خط پیش کیا، جس میں امیر قطر نے دورہ پاکستان کی دعوت کو قبول کرنے کا پیغام دیا۔
اس موقع پر وزیراعظم شہباز شریف نے کہا کہ پاکستان قطر کے ساتھ اپنے برادرانہ تعلقات کو قدر کی نگاہ سے دیکھتا ہے۔ کویت اور قطر کے ساتھ تعلقات کو مزید فروغ دینے کے لیے یہ بڑی پیشرفت ہے، امیرکویت اور قطر کا دورہ سرمایہ کاری اور دیگر شعبوں میں تعاون بڑھانے میں کارگار ثابت ہوگا۔
